Dayak Iban

1.                DAYAK  BORNEO.

Kebendar reti Dayak Borneo tu iyanya Orang Asal Borneo tauka Native of Borneo ba jako Ribai. Borneo mega tau dikumbai The Land Of Dayak, laban dia asal jako Dayak pansut ke diguna sampaika seharitu. Sida udah diau ba pulau Borneo puluh ribu taun ke udah lalu, iyanya maia proto-malay ke pindah ari tanah besai Asia maia semoa pulau Nunsantara agi bejantil enggau tanah besai Asia, agi ulih bejalai kaki. Bansa bukai tau kumbai datai maia Deutero-Malay, iyanya berengkah ari 5,000 taun ke udah lalu. Sida tu datai ngena perau. Suku kaum bansa Dayak tu maioh ba Borneo tang suku kaum ke nunjul agi iyanya Iban, Kadazan, Bedayuh enggau Kayan. Sida ke diau ba Sarawak iyanya baka Iban, Bidayuh, Kayan, Kenyah, Kelabit, Ukit, Penan, Punan, Kejaman, Salako, Lalahan, Tatau, Berawan, Tringgus, Baketan, Kiput enggau Lun Bawang. Iya ke diau ba Kalimantan Barat iyanya Mualang, Maloh, Kanayan, Kantu, Bidoih, Ot Danun, Benuag enggau Ngaju. Sida ke diau ba Kalimantan Timur iyanya Kayan, Kenyah, Bahau, Bakumpai, Tunjung, Modang enggau Maunyan. Sida ke diau ba Sabah iyanya Murut, Kadazan enggau Runggus. Suku kaum Dayak Meratus maioh diau ba Kalimantan Selatan. Dayak bukai baka Banjar, Besaya, Bajau, Melanau maioh masuk Islam, muai bansa diri empu lalu ngambu diri empu Melayu.

Nyauka 70% ari Tujuh juta (2015) mensia ke diau ba Borneo ari kaum suku Dayak tang sida diau beanchir-anchir laban menoa sida udah dipechahka bala koloni kalia ngagai empat bengkah Negara iyanya Sarawak, Sabah, Kalimantan enggau Brunei. Empat buah negara nya betuaika bansa bukai magang, orang ke ukai asal Dayak. Arinya pengidup sida agi beterabul, bedau tentu terenah nitih kedeka juluk ati bansa Dayak ke amat. Semoa pengawa ke deka diaduka sida agi bepangai ba orang ke megai sida. Diatu kitai meda bala Dayak ba Borneo maioh udah masuk agama Islam, muai bansa diri empu lalu ngambu diri empu bansa Melayu ke beasal ari Minangkabau, Sumatra. Kena nemu lebih silik agi pendiau pengidup bansa Dayak, kitai ngambi siti suku kaum ke nyadika teladan laban nyauka semoa Dayak ba Borneo tu sebaka jalai pengidup. Ditu suku kaum Iban ambi ka banding, awakka Dayak bukai ulih nemu naka ni penyelai adat, budaya enggau jalai pengidup suku kaum Dayak siti-siti.

Iban Rumah Panjai

Iban maioh diau ba Negara Sarawak, East Malaysia begulai enggau Dayak bukai di Borneo. Penyampau tubuh sida angka bisi sejuta iko seluruh Dunya. 80% diau ba Sarawak.

Ari segi gamal bansa Iban kurang lebih enggau panggan diri. Kulit sida kuning lengsat. Sida chelum agi ari bansa orang ulu, Banjar enggau Kadazan. Buk bisi nya lurus bisi nya bekeriting. Idung pandak, tebal, lebar enda manchung. Mata chelum, maioh chipit bisi ga besai juring. Tubuh maioh paga tang bisi ga besai tinggi. Kelia bala Iban bepantang magang, ambih tubuh tanda sida Iban. Pantang ke tebilang iyanya bungai terung ba tandan bau, ukir degok, ketam ba belakang. Iya ke udah bedengah ngaga genturun ba jari. Maioh agi dengah maioh agi titik genturun ba jari.

Sida ke indu kelia pan bisi bepantang. Sekeda beukir degok. Pantang ba lengan tanda iya ke tau ngebat. Baikanya indu tauka laki, Iban kelia endang belubang pending. Besai agi lubang pending manah agi dipeda. Pending ditating enggau utai berat baka temaga awakka jampat besai lubang.

Gari Iban kelia iyanya sirat enggau kain kangan aja. Nadai tanchut enggau kelambi. Pemakai Iban kelia semina asi, empasa, mulong, upa, manuk, babi, ikan, jelu babas, burung enggau bului babas. Nadai bisi penganan, roti, kopi, gula, tusu, orange baka kediatu. Iban ulu nadai makai kambin enggau chapi. Nadai makai ikan tasik. Maioh sida enggai ensium bau chapi, kambin enggau ikan tasek. Sida semina rinduka pusu, ikan masin enggau belachan. Lauk semina champur biching enggau garam aja nadai perempah bukai baka kemaiaritu. Kemaioh agi utai panduk ngena periuk tanah, lulun, tunu enggau pansuh. Jelu ke maioh ulih digalau gagaka jukut, salai, barur enggau gelukos. Nadai bisi peti ais baka kediatu endur nyimpan pemakai. Utai kena makai maioh ngena jalung enggau pingai seputi. Kadang ngena daun long ke pingai. Bedau bisi jalung bekacha. Maia bejalai Iban mai bekal. Asi dibungkus ngena daun long tauka upih pinang tauka upih inyak. Bisi sekeda mai garam, salai tauka pansuh. Upih pinang enggau daun long tu lubah ngasuh asi bari serta liat enda mudah charik baka daun bukai.

Gambar ke dipandangka di baruh tu ngayanka gaya pengidup Iban diau ba rumah panjai kelia ke bedau nemu sekola. Iya ke manah agi ari tu nya maia Iban udah nemu sekola, nulis enggau macha tau dikumbai Iban modern. Nyadi tu asal pendiau Iban bedau nemu sekola enggau nengeri, bedau nemu perintah, bedau nemu duit ringgit, bedau nemu politik, bedau nemu utai reti dagang, bedau nemu hospital agi idup ngena manang. Nadai radio, letrik, telepon, nadai nemu pasar, nadai nemu dunya luar. Iban idup agi ngena chara lama, nadai nemu reti utai ke nama sain, teknoloji, multi media, ekonomi, kereta enggau computer.

Bird View Longhouse & ruai

Beban perau enggah peredah, Nganyan tikai bebuah & langkau ampun.

Muai Entebalu & Naburka Berau Kuning

Miringka anak deka mandi ka ai & Sandau Hari

Nyendiaka sandau hari & Beban lesong & Ngambi Ngabang

Miring anak mandi & Kenyalang Pengulu Munchat

Meda buah kain & Ngaga ulu lunga & Nandok Ijuk

Ngupas tuju bilik & Ngayuhka perau

Malu tekalong & berandau

Nyembi beras & indu bekindu udah beranak.

Nyayang bai & niki tangga

Berua & ngerak sandong & niti daun

Masu batu pangul & meda ati babi

Ngaga kerungan manuk & nyala

Ngebau & nutuk padi

 

Nyeruri gegar & nyelapat kenyalang

Penganta indu & mangaika piring

Pedilang antu pala & Pengulu Ngali miring Sandau Hari.

Garam amat penting ba pengidup Iban. Sida madahka garamnya nyadi ka tulang sida lumor dua kelimpah ari asi ngereja pengawa. Keba jako tuai enti nadai utai kelauk maia makai, “Nadai kami sebilik, ngetup garam aja seharitu.” Reti nya makai asi enggau garam panduk kena makai nadai utai ke lauk. Garam mega nunjukka pengidup bansa Iban kelia. Ditu orang tuai besebutka leka jako munyi tu; “Nyamai endar pengidup sida sanu diatu, udah teketupka garam.” Reti nya pengidup orang nya udah menyana mimit.

Iban makai ngena jari nadai bekena ka sudu tang bisi ai basu endor masu jari. Maia makai kadang-kadang Iban betundi. Sida nabak ka asi tauka lauk maioh-maioh ngagai pinggai pangan diri. Rindu meda pangan diri ngeliat nembu ka asi tauka lauk. Sida ari tisi ngeluji iya ke makai. Uti baka tu selalu nyadi maia gawai ngagai sida ke agi bungas. Maia makai mega endur Iban belajar pangan diri laban sida makai serta begulai enggau diri sebilik. Makai beranti lalu pemakai dibagi bela. Iya ke indu duduk pipiq maia makai enda tau empikang ka pah. Indu ke duduk empikahka pah selalu disebut orang indu dadak mudah mai orang laki ngayap gali. Sida ke laki duduk nyanggah maia makai. Enti maia bisi munsuh sida ke laki duduk nyungkung laban takut ka diri empu enda ulih angkat jampat enti bisi munsuh datai nyerang. Duduk nyanggah tau ngasuh kitai tetungkam enti angkat ngenyit maia begau imbau. Iban duduk nyungkung bakatu selalu maia makai ba langkau umai nangika munsuh datai. Enti orang makai kitai mansa mesti negu dulu takut ka punig tau ngasuh bebadi.

Sida ke indu diajar orang ke tuai imun laban nanda ka sida indu ke mereti, enda mudah mai orang laki gali ngapa. Enda seredah nyebut utai sengapa. Bejalai sida ke indu asuh begadai niti ruai enda tau beganyat maluka kaki bekeredat bebunyi bejalai niti ruai. Maia nutuk orang ke tuai ninga bunyi talun sida ke indu. Pangkung bunyi talun nutuk indu ke manah bebunyi menaning anang enti sida bebala maioh. Siti lesung kadang-kadang 4-5 iko nutuk. Dia kitai ninga bunyi talung sida bekeredat, munyika beranyat rumah. Nya manah ko orang tuai kelia. Bunyi talun mega bisi reti. Talun tubuh tiga. Talun tubuh empat. Talun tubuh Lima. Bunyi talun nyeratai nanda ka nutuk bebala maioh. Bunyi talun mega tau nganggau ka orang ke tesat ba kampong. Laban sapa ke tesat ari menoa bukai enti ninga bunyi talun, sida nemu bisi rumah orang semak nya dia. Sida tau mendingka bunyi talun nya lalu niki rumah madahka diri tesat.

Cherita tuai bisi nusi, Ngelingkong menyadi Muan anak Chabu, uchu Tado ke belelang ke Undup ari Batang Ai ngiga bini diasuh antu dalam mimpi tesat ba Undup. Lebuh ke tesat iya bisi ninga bunyi talun orang nutuk. Bunyi talun lalu dititihka iya tang iya enda niki nanggika nya rumah munsuh. Iya ngipa ba pendai nganti indu mansang mandi, ngemata ka indu mandi bekena ka kain bekengkang adung. Dia meh iya nemu bini iya. Ngelingkong tu landik agi disebut orang Undup Bara. Laban ensumbar tauka jejuluk iya iyanya Bara Api.

Asal usul endor Iban diau ba rumah panjai, nebng sungai. Rumah digaga besitak dikumbai pintu endor siti keluarga diau. Tuai ke ngempong adat, burung enggau semoa penemu dikumbai Tuai Rumah. Bilik tuai rumah selalu ba tengah rumah. Bisi sekeda berakup sampai tiga buah rumah panjai ba siti tempat. Rumah panjai Temenggong Kok ba Entawau, Balleh bisi tiga buah rumah panjai berakup tauka betugung ba siti tempat.

Rumah panjai Iban bepun ari puting setak ngagai puting setak. Ari tuju tanju ngagai tuju bilik. Tangga gaga ari kayu pansap serta bisi lalau. Kelia rumah Iban panjai sampai 50 pintu serta tinggi. Sida takut ke dialahka munsuh. Rumah tinggi tusah direjang munsuh enggau sangkuh. Iban nupi babi, manuk, mayau enggau uduk. Babi enggau uduk tau nyadika penyaga rumah. Enti bisi antu tauka munsuh babi baus baruh rumah lalu uduk tau merung enti bisi antu, nyalak enti bisi munsuh datai. Manuk tau separ terebai malam hari enti bisi munsuh datai.

Rumah Iban kelia nadai tentu lama. Dua tiga taun sida pindah tauka berumah baru laban wee dikena merekas Nanchang ramu baka kasau enggau engkiai repuk. Nadai bisi paku kena mantang rumah. Agi ga Iban selalu pindah ngiga menoa ke baru, nya ngasuh sida selalu berumah serta maioh pulau galau, temuda, tembawai enggau pendam. Ba siti tempat kadang-kadang sida berumah dia bisi dua tiga kali nitihka pemanah burung, mimpi tauka kenyap. Sekeda bilik bedau tentu siap udah direrak berumah baru tauka pindah kebukai. Maioh mega Iban pindah rarika munsuh. Iban Sebuyau, Balau, Undup enggau Saribas dulu agi terenah pendiau laban sida dulu agi nundukka rajah Brooke. Sida jarang berumah, enda baka Iban ulu ai. Maioh sida tu enda ampit rumah ke bisi lesung betalun, tangga pansap enggau ramu perekas enggau wee. Diatu atap udah diseruri enggau atap zince diberi perintah.

Rumah muntang aja digaga siti tingkat. Baruh perabung digagaka sadau nyadi store nyimpan semoa utai baka lanji, perampan, agak, sintung, ladung, tikai, chapan, lugu benih, tibang endor nyimpan padi. Tanju kena nyembi utai baka padi. Bisi sekeda bira ba tanju. Tanju mega kena endor bekerja ngaga utai baka ngaga lesung, ngerepik kayu. Ba terutu atap selalu bisi tasang endor manuk betelu. Tanju digaga lalau ari buluh betong pia mega gegar tanju. Kelia ruai selalu besai agi ari bilik. Naga ka temuai datai enggau bala pengabang rami maia hari gawai.

Rumah Panjai: Ruai endor berandau, ngaga duku, endor beranyam, ngebat, endor rami enggau maioh pengawa bukai. Antara ruai enggau bilik sepiak bisi pedilang endor nyalai antu pala enggau bekindu maia chelap laban nadai tentu bisi baju tauka pua. Pedilang endur manaska tubuh maia chelap dini hari. Enti temuai niki serta meda antu pala ba pedilang dia sida nemu ruai orang nya ruai bujang berani. Maia ngetau tauka ngembuah engkabang ruai kena nugung ka padi ke bedau ditungku tauka kena nugungka engkabang bedau chukup dijembi. Atas ruai dikumbai pemangai. Nya endur engkah sangkuh, terabai, ilang enggau nyabur. Bisi sekeda endur mangaika tikai ke manah dianchau nagaka temuai datai. Antara ruai enggau bilik digaga selapat ke dikumbai tampuan. Nya selalu endur bala indu nutuk laban endur talun tauka lesung ditanchang. Sepiak talunnya pangkat kayu.

Moa pintu kadang-kadang endor engkah manuk sabung. Kebuah manuk sabung engkah ba moa pintu awak ka iya selalu dipansa lalu jinak nyamai dilatih. Pintu ditating awak ka nikup ka diri empu nya ke ngasuh maioh pintu bekeritit bebunyi enti ditukang. Orang ke ngayap selalu belubah nukang pintu takut ka beritit bemunyi ngerak orang ke tinduk. Kadang-kadang apai orang indu nganu enti anak iya digayap taja pan begayap sigi adat bujang enggau dara zaman kelia. Nya ke ngasuh sida ke ngayap ari sadau nangika pintu bemunyi beretit tauka enda ulih ditukang laban dikunchi rapit maia malam ari. Tang mayau ke diau ba sadau selalu begau enti dipansa orang ngayap. Bisi sekeda orang bujang sigi nguang nganjung diri ngayap ngagai menoa siti-siti. Napat ka indu guang. Sida bebala maioh laban menoa dipejalai dua tiga hari. Sida diau sampai bebulan ba rumah panjai ke digayap sida nitihka pemudah indu ke digayap, nganti randau ke chukup enggau apai indai indu endor ngaduka diri jadi melaki bini. Kelia ngayap ukai endor ngiga ulih nyadi playboy tauka pengindu munyi jako kemaiaritu. Ngayap dikena ngiga indu ke bini. Keba enti ngayap apai-indai orang laki dulu madah sapa indu patut digayap lalu dini menoa indunya. Dudi ari tu Iban maioh salah guna enggau pengawa ngayap nya ke ngasuh adat begayap dipuntan ka Iban. Maioh Iban ngiga ulih. Bisi sekeda enchuri. Bisi sekeda semina deka beduan indu aja laban udah indu betubuh bisi sida enggai  betanggungjawap.

Ba tengah ruai mega bisi tiang siti ke besai, dikumbai tiang tengah. Nya endur ngaitka duku, laja, jabung, gagung, kadang-kadang endur ngaitka pukat enggau jalai. Pengait digaga ari tanduk rusa diberekas begulai enggau tiang tengah. Tiang tengah digaga tegap laban nya nunjukka pemintar orang ke diau ba biliknya. Nirika tiang bebala maioh bebai orang rumah bukai, ngena tulang diri empu nadai bisi crane. Pengawanya dikumbai ngentak. Maia ngentaknya mensia miring, munuh babi serta beburung, milih kayu burung ke manah kena ngetak ka rumah awak ka rumah chelap, bulih utai serta rami maioh bala.

Pintu tama ke bilik digaga manah-manah ari kayu pansap labannya nandaka pemanah rumah tauka bilik siko-siko. Ba moa pintu bisi tempuan dalam bilik endur sida ke indu ngengkah genuk nyimpan ai. Kadang tempuan tu endur mensia mandi lebih agi mandikka sida ke anembiak agi mit. Tempuan endur bira enggau kemi baka jamban kitai kemaiaritu. Sepiak tempuannya dapor endor berapi, nyalai, mansuh enggau manduk utai. Atas dapor bisi empara endor engkah kayu, salai enggau utai dempa ke bukai. Utai dempa tu digalau ke ari bukai kena tepuk asap maia berapi nya ke ngasuh lauk nya tau enda bari.

Bilik endor makai, ngirup, tinduk serta endor betenun pengawa sida ke indu. Bilik nadai bepangking. Semoa tinduk ngaringka diri besusun nitihka kedeka diri sebilik. Tikai peninduk pilih iya ke manah digaga ari wee. Siti tikai dua tiga iko tinduk dia. Maia tinduk tikai dianchau tang siang ari digiling baru. Nadai bisi tilam, panggal, kibung enggau pua. Lukai ditunu tiap malam kena muru nyamuk. Tisi bilik didijirka enggau tajau, tawak, gong, bebendai ngayanka pengaraja diri sebilik. Tajau mega endor nyimpan berau enggau ai tuak. Guchi enggau Gong nya pesaka ke pemadu berega. Tajau enggau tawak selebuan sama enggau patig nyawa siko mensia. Ai tuak nadai champur enggau gula agi tulin. Tuju bilik kadang gagaka langkau mit endor engkah kerungan endor manuk diau. Baruh nya endur nyimpan dulang meri jani makai. Tuju bilik mega endor jalai mensia ngayap tauka endor rari maia munsuh niki. Keba tuju bilik digagaka tangga tang tangga nya selalu ditarit keatas maia malam ari takutka munsuh niki ari belakang rumah. Sepiak dinding enggau bilik bukai kadang-kadang digaga bilik penyenguk endur ngunsung panggan diri ari bilik enda mansa ruai, lebih agi sida ke indu.

Ramo rumah panjai kelia digaga ari kayu segala magang nadai bisi dipansap tauka sayat. Nadai chin saw. Ramo ditanchang enggau wee nadai bisi paku lawang enggau tukul. Tanchang bisi bentuk nitihka selakah ramo ke ditanchang. Tanchang engkiai begulai enggau kasau lain ari tiang penyurai begulai enggau raran rumah. Enti salah tanchang rumah enda tegap tau berenyang deka tumbang. Nanchang ramu begunaka pengelandik. Keba mensia belajar nanchang ramo. Dinding kemaioh agi kulit kayu, buluh pansap enggau kajang digaga ari daun kerupok. Sida tu kepit enggau kayu tauka wee danan ke besai. Iban ulu nadai bisi apong sida enda ngaga rumah enggau daun apong baka Iban ili. Gegar digaga ari buluh betong. Atap digaga ari kayu gerunggang tauka tebelian. Kayu gerunggang lumpak nyamai dibelah besingkap nya ke ngasuh Iban muntang ngaga atap ari nya. Tang kayu nya enda ulih kena lama jampat repuk enda taan lebih ari lima taun. Tebelian kayu ke manah serta taan seumur idup. Nya kebuah Iban enti pindah atap tebelian dibungkar sida dibai pindah diguna baru. Atap ditebuk endor ngikat ba engkiai.

Kayu gerunggang mega selalu diguna Iban kena ngaga dinding papan, tangkir perau enggau sarung duku. Iya nyamai ditetak serta nyamai dipansap tauka dibelah. Kayu pelai rumpak lalu nyamai diukir kena ngaga kenyalang. Kayu tapang liat lebih agi bandir tapang nya ke kena ngaga gasing. Tiang rumah maioh ngena kayu tebelian, tekam enggau selangking. Nya kayu taan lubah repuk laban ai. Kayu tu selalu engkah ba tampuan bilik ke selalu basah. Ba senentang tampuan selalu dijaga takutka ramo dia repuk lalu rumah tumbang. Kah selangking enggau tebelian mega selalu kena ngaga rarong tauka sungkup endor engkah bangkai orang ke mati. Sumpit ke manah digaga ari kayu tapang nya ke dikelandikka Iban Sumpit Tapang.  Kayu ruan manah ke terabai laban liat serta lekat pantap duku, enggai pechah. Iban ulu selalu begunaka agang kena berapi laban kayu nya taan, manah kena manduk utai. Agi ga kayu nya muntang digiga sida ke indu enggau bala anembiak.

Iban maioh macham utai penama gawai nitihka menoa ke endor sida diau. Gawai ke besai iyanya Gawai Kenyalang ba Iban ke datai ari Batang Ai, Gawai Antu ba Iban Saribas. Sida nunggah betara ngena piring lalu piring maioh rengat. Bisi nya piring ngaga keduran, sandau hari enggau iya ke bukai. Tusun piring mega enda sama. Iban Saribas tusun piring sida muntang laban ditabakka ba pingai siti aja. Enggi Iban Batang Ai lain agi, piring sida dirintai ka dulu sebedau ditusun ba siti pingai besai. Daun sirih, kelait, daun ruku apong enda tau dichebik tauka charik. Iya kena pilih manah-manah. Telu enda tau belah dua. Seolah betara Iban Ulu Ai cherewit milih makai sedangka betara Iban Saribas baka ke enda milih.

Betara ke ditunggah semoa Iban sama magang tajapan chara sida miring lain iyanya Keling, Kumang, Bungai Nuing, Indai Abang, Sabong Abong, Orang Panggau, Sempulang Gana, Sengalang Burung, Antu Gerasi, Ini Manang, Ini Andan, Raja Nabau, Bunsu Remaung, Bunsu Gendali. Ari semoa sidanya, iya ke pemadu tinggi iyanya Bunsu Petara, tauka Raja Entala tauka Allah Taala.

Cherita pasal Iban tau dipeda nenak agi ba Iban Wiki, tusun cherita ke penudi ngena jako ribai enggau bup pasal Profile Menoa Nanga Bertik ke ngayan ka pengidup kitai Iban jeman kelia ba rumah panjai ke bisi diambi maioh macham gambar ari taun 1974 ngagai 1979 ke nadai kala dipeda mensia kemaiaritu.

Wiki bisi madah, Iban datai ke Sarawak dalam kandang taun 1675. Sida terubah diau ba Batang Lupar, ulu Kumpang enggau Undup, pemindah ari Batang Kapuas, menoa tunggaka Tunggau. Di Kapuas orang ke nyauka sebaka jako enggau adat enggau bansa Iban iyanya Kantu, Memaloh, Mualang, Semberuang, Bugau enggau Seberu. Sida tu agi diau ba Batang Kapuas Indonesia sampaika seharitu. Ari Ketunggau mega Iban bisi pindah ke Gedong enggau ke Lundu.

Maia ke diau ba Batang Lupar baka Undup, Sekrang, Ulu Ai, bala Iban mupuk ngerekai ke menoa bukai. Sida bebunuh ngalah ka orang asal. Sida ke pindah ke Layar enggau Saribas belaban enggau Beketan enggau Seru. Sida ke pindah ke Batang Rajang belaban enggau Beketan, Ukit enggau Kayan. Bansa Beketan enggau Seru maioh betampil enggau Iban lalu ngambu diri Iban tang bansa Ukit enggau Kayan mengkang nitihka raban bansa diri empu. Maioh Ukit rari ke ulu Rejang tang Kayan endang sigi diau ba ‘Central Borneo’ tauka ulu Baram enggau Rejang. 

Ba Batang Lupar sebedau penatai Raja Brooke, Iban diasuh Sultan Brunei ngisi pupu. Sida mega diberi sultan pangkat  baka  Orang Kaya Dana Bayang. Kebuah sida diberi pangkat laban bala Iban tu nulung sultan Brunei nyaga pengelikun menoa ke selalu diserang bala Bajau enggau Illanun ke datai ari menoa Filipin. Udahnya sida nguasa tebing tasek ari Nanga Kepuas sampai ngagai Nanga Batang Rajang. Sida ukai nyaga aja tang mega nunda pengawa bansa Bajau enggau Ilanun ari Filipin ke ngerumpak kapal ke bejalai nebing menoa Sarawak. Sida ngerumpak kapal dagang China ke bisi datai bedagang enggau sultan Brunei. Pengawa sida tu mai penyarut ngagai kaul sultan Brunei enggau menoa China ke ngejungka sultan Brunei minta tulong Raja Brooke. Sida mega ngalahka bala China di Pontianak serta ngalahka Dayak bukai ke ngelinggi sida

Maia tu Iban agi segempung ati bedau bisi dengki enggau pangggan diri. Iban bedau pechah, bedau belaya panggan diri. Sida diibun tuai siko benama OK Dana Bayang. Keba seluruh Iban di Borneo baikanya Iban Sebuyau, Iban Balau, Iban Remon, Iban Batang Ai, Iban Katibas, Iban Batang Rajang, Iban Balleh, Iban Kapuas sigi agi begempung magang. Maia ngalahka Kayan ulu Baram enggau pasar Pontianak sida sama bala. Udahnya sida mupuk belaya diri sama diri. Sida kena sabung Melayu ke diau ba Sebuyau ke betuaika Indra Lela. Sida mega belaya ketegal utai bukai.

Nyadi sekali, dalam taun 1834, sebedau Iban ari Sekrang ke betuaika Orang Kaya Rabong ke ngalahka Balau ba Lingga, dia siko manang ari Balau ke benama Langgong madahka Iban Sekrang kena sabung Indra Lela ngayau Iban Balau. Nadai kebuah kitai Iban belaya diri sama diri, ukai kitai bisi laya enti enda disabung bala Indra Lela ko iya bejako. Indra Lela nemu berita tu. Arinya iya muai diri empu ka ai lalu nyadi baya Batang Lupar ke begelar Bujang Senang. Nambahkanya Iban Sebuyau, Iban Remon enggau Iban Balau dibai Rajah Brooke ngalahka Iban Saribas ke agi begempung enggau Iban Skrang, Iban Undup enggau Iban Batang Ai ngalahka Dayak ba nanga Rejang. Kayau tu dikumbai Beting Maru. Udahnya Brooke ngaul Iban Saribas ngalahka Iban Skrang ke betuai ka Rentap. Iban lalu pechah baru lebuh Rajah Brooke begulai enggau Munan munuh Balang ke nyadi tuai Iban ulu Batang Ai, Ulu Katibas, Ulu Kenawit, Ulu Balleh enggau Ulu Kanyau.

Maia ngayau Kayan ba Batang Rajang, Balang dibai Rajah Brooke nyadi ketuai Iban ulu begulai enggau OK Dana Bayang. Mati Dana Bayang Iban ili ke nanahka rajah Brooke dipegai Pengulu Dalam Munan. Iban ulu bisi pechah. Batang Ai betuaika Ngumbang seduai Bantin. Ulu Katibas betuaika Moari. Sida tu ngelaban Rajah Brooke laban ke enda puas ati ke pemati Balang. Sida agi bebunuh panggan diri sampai Temenggung Kok ngaga pengawa Bepantap Babi bebaik enggau panggan diri di Kapit dalam taun 1924.

Maia Jipun datai Iban Saribas enggau Skrang setanah enggau Iban Batang Ai baru ngelaban Jipun. Bakanya mega Iban bukai di seluruh Sarawak sama bela ngelaban Jipun. Semina Iban Balau enggau Iban Sebuyan nanahka bala Jipun. Sida tu dikumbai Iban bukai Iban Pelanduk laban ke nanahka Jipun. Maia ngaga anggur masuk Malaysia, Iban ulu nyukung Jugah masuk Malaysia tang Iban ili agi kayang-kayang. Arinya, politik Iban pechah sampaika seharitu enda ulih diatur, Iban enda ulih digempung. Sida masuk maioh macham parti belaya diri sama diri. Bela besui pangan diri madahka pangan diri jai, salah. Siko pan nadai ati bisi deka ngempong Dayak semoa sekali baka pengawa Temenggong Kok kelia. Semoa deka ngambi ulih baka penemu Pengulu Dalam Munan enggau ajah iya. Sida rising rising ngelesie ka Iban bukai ke alah laban sida. Nyadi tu perangai ketuai bansa Iban.

Maia James Brooke datai Iban dikumbai iya Sea Dayak laban sida tu nadai bisi bansa semina dikanggauka orang Dayak tauka orang aja nitih ka menoa endor sida diau. Bala Sea Dayak tu bisi bejalai belelang ke ulu Batang Rajang lalu betemu enggau bansa Kayan. Lebuh ke betemu tu, sida madah ka diri orang belelang datai nemuai matau menoa. Arinya Kayan ngumbai sida Hi Van, retinya orang belelang (Wanderer). Jako Kayan tu disebut sida Iban lalu ditunda sampaika seharitu.

Arinya bala Sea Dayak ke datai ari Lundu enggau Semarahan ngumbai diri Iban Sebuyau. Sida ke diau ba Tanah Mawang enggau Sadong ngumbai diri Iban Remun.  Sida ke ari Undup ngumbai diri Iban Undup. Ari Lingga ngumbai diri Iban Balau. Sida ke datai ari Sekrang dikumbai Iban Sekrang. Sida ke datai ari Layar, Paku, Krian enggau Rimbas dikumbai Iban Saribas. Iban ke datai ari Lubok Antu dikumbai Iban Batang Ai. Ari berapa iti tempat tu Iban ngerekai ngagai menoa bukai sampaika seharitu.

Sida ke diau ba Serikai, Sibu, Bintulu, Miri, Kapit, Batang Rajang, Limbang selalu dikumbai Bilak Sedik Iban ke maioh jako enggau adat ke sama enggau Iban Batang Ai. Semoa jako Iban tau dikumbai sama, sida bela mereti utai ke disebut panggan diri. Semina bunyi tauka tiun jako sida ke bisi nyibil ari pangan diri. Tiun jako Iban Saribas lundai jauh lain ari tiun jako Iban bukai. Iban Saribas discipline agi ari Iban bukai ba semoa pengawa. Sida taluk agi ka bansa, adat, menoa enggau purih diri. Sida lubah ringat enda jampat ngeredingkang. Iban Saribas selalu beangan ngangap diri Iban lebih maju ari Iban bukai. Nya kebuah sida jarang begulai enggau Iban bukai lalu tusah deka betampil enggau Iban bukai tauka bansa bukai. Iban bukai sama bela baikanya Iban Sebuyau, Iban Remun, Iban Balau, Iban Undup, Iban Skrang, Ibang Batang Ai, Iban Batang Kanyau, Iban Batang Rajang. Sida rengkar agi. Jako sida renyan agi. Perangai sida kasar agi. Sida lebih peramah agi serta lebih mesra begaul enggau orang bukai. Sida tu maioh betampil enggau panggan diri pia mega jadi melaki-bini enggau bansa bukai.

Nama kebuah Iban Saribas lain agi tiun jako enggau peranggai ari Iban bukai? Tanya tu selalu aku giga ba internet enggau bup tang nadai. Maioh sida ke tuai ari Batang Ai madah jako Iban Saribas betiun lubah serta landu laban sida maioh bechampur enggau Beketan enggau Seru. Laban menoa Layar, Kerian, Saribas kelia sigi diwan bansa Beketan enggau Seru. Bansa Beketan enggau Seru tu alah kayau laban sida tajapan tubuh Iban Saribas tu mimit ari bansa Beketan enggau Seru. Bansa Baketan enggau Seru ke alah kayau tu lalu masuk ka diri nyadi Iban nunda chara pengidup sida, betampil beringgap enggau sida. Tu ngasuh adat, budaya, bunyi jako enggau pendiau pengidup Iban Saribas lain mimit ari Iban bukai. Keba ba ensera Iban Batang Ai, sida lembambang ke nusi ensera selalu ngeluluka leka bunyi jako Baketan ke landu serta tajam. Jako sida lekat ba rekung. Jako bansa seru bekedungu, munyi orang ke muchau nyauka munyi jako Iban Saribas. Keba jako Iban madah “muchau munyi melanau ninbau bangkung.” Nganu orang ke bejako bekedungu. Bansa Melanau tu maioh datai ari bansa Seru. 

Ba Batang Ai Iban ke bisi betambil enggau Beketan iyanya Rumah Engkaras enggau Jengin. Keba jako sekeda indu ari Jengin enggau Engkaras kelia bisi lekat ba rekong. Landu. Niang Tuai Rumah Alau ke nyadi tuai rumah orang Jengin dalam taun 1980an endang sigi purih Beketan tang udah nyadi Iban. Iban Saribas mega maioh baka gamal China. Tu angka laban bala indu China ke diambi sida nyadi ulun maia ngayau Pontianak kelia bisi betampil enggau sida. Agi ga gamal bala China tu maioh lebih bajik ari indu sida menoa tajapan sida nyadi ulun. Bala indu China nya maioh raban ukai siko dua. Sida bisi beratus iko. Sida tu nyadi Iban magang. Iban Batang Ai tau dikumbai Iban asli, sida jarang betampil enggau orang bukai. Sida jauh ari dunya luar, semadi nyau diatu sida baka Iban bukai betampil enggau maioh raban bansa.

Beburung.

Dulu kelia semoa pengawa Iban bepanduka mimpi enggau burung serta dialuka enggau pedara tauka piring. Enti mimpi manah tauka burung manah baru pengawa dikerja. Enti mimpi jai tauka burung enda manah pengawa dibatalka. Burung jai selalu bekait enggau Ketupung. Iyanya kitai ninga ketupung lebuh deka ngaduka utai. Nya burung nagang. Utai enda manah deka nyadi. Burung bukai ke diguna Iban iyanya Nendak, Pangkas enggau Bejampong. Bisi mega jelu nyadika burung. Jelu tauka burung niki rumah dikumbai laba. Iya tau mai pengenyai tau mega mai pemanah. Enti jelu tauka burung nya ulih tangkap kitai datai ka rumah lalu bunuh serta empa kitai nya nyadi laba manah, mai tuah mai limpah. Tang enti iya lepau enda ulih tangkap tau ngujungka penusah. Tau munuh nyawa. Jelu meraka jalai muntang pejalai kitai lebuh kitai mansang ngereja utai. Nya nunjukka burung jai. Tang burung jai tu tau pulaika manah enti tuai nemu ngaduka iya. Retinya tuai kitai nemu miring tauka nimpang iya enggau pedara lalu besampi ke betul. Jelu bemunyi lebuh tua baru deka bekejang nya burung nganu.

Pemali burung bukai baka pechah utai kitai baru deka bejalai, putus mak tauka beg, labuh utai maia deka bejalai, tauka hari ujan dini hari maia kitai deka angkat bejalai pagi. Tang enti ujan benung kitai ba rantu jalai tauka benung tua ngaduka pengawa nya nandaka burung manah laban kitai basah retinya kitai ikak laban utai ulih. Burung bukai tau disebut kitai manah magang. Nyadi nya sekeda adat burung ba kitai Iban. Mimpi jai iya baka mimpi rawan, mimpi pechah utai, mimpi telih, mimpi labuh tama lubang, rarah ngeli, mimpi karam perau, mimpi angus rumah. Pia mega maioh kitai Iban kelia ngiga paung burung ke manah kena bumai, kena berumah, kena pegi ngagai menoa bukai. Sekurang nya kayu Nendak awak ka rumah kitai chelap tauka penjalai kitai selamat.

Ba pengarap Iban kelia, kayu burung ke dibai kitai bejalai tauka diibun kitai nandaka bisi betara enggau kitai belama. Nitihka sumpah burung ke dibai kitai. Burung enggau mimpi tau ningang pangan diri enti kitai belaban enggau pangan diri. Sapa mimpi tauka burung manah agi nya ke tau menang. Ngiga burung retinya kitai bejalai ngagai kampong, mendingka burung bemunyi. Lebuh kitai bisi ninga bunyi burung manah, kitai lalu mabut kayu mit siti lalu besampi dia madahka nya kayu burung ke didinga kitai. Ambika chontoh kayu Nendak. Kitai bejalai pagi serta ninga Nendak bemunyi. Udah nya kitai mabut kayu mit sepun lalu besampi. “Nya dek nendak udah nyadika burung kami. Kami chelap lindap gerai nyamai nadai nama, nadai utai ngawa ngibun paung bai dek.” Kayu nya lalu bai pulai. Ba rumah iya digaga ka piring tauka keduran lemai. Sepanting kayunya lalu diibun enti kitai bejalai tauka sangking ba tiang rumah enti ngentakka rumah.

Ngampun.

Mimpi jai selalu tabas enggau adat kelia, maia pagi hari udah bemimpi dimalam. Adat nabas mimpi iyanya, kitai ngaga pengawa, nasi mimpi, iyanya segenggam beras disimpan dalam pingai siti. Pingai diisi enggau ai. Telu manuk mata sigi simpan dalam pingai begulai enggau beras basah. Pia mega besi siti engkah atas pingai. Ngena telu nya Iban bebiau, miau diri empu tauka ngasuh orang bukai miau besampi. Udah bebiau telu manuk dibuai ditikau ke bukai awak ke mai mimpi ke jai rari enda ngasi. Orang ke jai mimpi lalu asuh ngetup besi awak ka kering baka besi. Iya mega dichal enggau telu matu serta enggau ai ba pinggai ba kening kena sengkelan tubuh iya. Beras basah mega kena buai. Bisi sekeda muai pingai sekali. Lebuh ke ngetup besinya iya ke bemimpi lalu nyebut; besi lemi kami kering. Bilik mega dibiau enggau telu matu. Enti kitai bejalai kebukai, utai ke dibai kitainya mega kena chal sengkelan enggau telu matu dulu sebedau bejalai. Udah bebiau telu matu lalu ditikau awakka mai mimpi jai tabar, muai sial, semoa utai ke jai deka nyadi ba kitai tau nikal mutar ngagai antu ke deka ngachau kitai. Antu deka kena tinggang telu matu.

Kelia enti kitai selalu bemimpi jai kena dipegawaika orang, gawai sandau hari tauka keduran lemai mansau. Pengawa tu bela munuh babi. Sandau hari langkau babi digaga ba tanju. Kitai miring ba mega ba tanju lalu bisi naburka beras kuning. Piring diengkah ba teresang ke udah disedia begulai enggau tiang langkau babi. Siti piring diasur ngagai perabung ngena sekuar buluh ke panjai. Keduran lemai mansau digaga maya ngalih hari. Langkau babi digaga ba terutu atap. Kitai miring ba ruai lalu nadai naburka beras kuning. Piring diengkah ba terutu atap nadai ke tulang perabung. Ari ati babi nya kitai nemu pemanah mimpi. Enti ati babi manah nandaka mimpi kitai udah kena tawar pedara kitai, enti iya agi jai mimpi kitai agi deka minta, betara agi minta makai tauka agi tau ninggang kitai, ngerusak kitai. Ati babi jai iyanya anak ati bisi telih, meletur, pechah, mit, maram, layu gamal, tinggang urat. Ati babi ke manah iyanya anak ati ensapung tinggi, lichin, jernih, ninggang indu ati retinya ninggang pengawa orang. Enti anak ati bechabang tauka bisi tungking, bisi lebas. Enti laki nya orang diri nadai bepenyakit udah bebini tau ngayuka iya butang tang enti laki nya agi bujang tau ngayuka iya bebini tauka bulih utai, niki pangkat. Bagi orang ke sakit ati babi nungking tau ngayu ke iya enda ulih pulaika gerai, ati babi nungking ngayuka sungkup iya tauka menoa sebayan.

Enti mimpi majak ga jai udah dipiring sandau hari Iban kelia ngiga manang belian ka iya jai mimpi. Ari pengawa manang nya sida ngutun semengat. Retinya manang ngambi semengat sida sebilik ke udah jauh belelang ngagai menoa bukai lebih agi menoa sebayan lalu mai iya pulai. Semengat enda ga ulih diambi manang, Iban kelia nampuk.

Nampuk retinya meditation ba jako kemaiaritu, iyanya Iban kelia tinduk bemalam sampai tujuh malam beturut rungut kediri aja ba siti tempat ke endor nampuk. Bisi ga Iban duduk mejamka mata sambil besampi ngagai petara baka gamal Budha ke nampuk dulu kelia. Sida nampuk mindah kin-kia sampai bulih utai ke deka ati. Iban ngaga piring lima ba tempat ke nampuk. Sida munuh manuk lalu besampi minta tuah, minta limpah, minta sah, minta pemerani, minta pengaya-pengeraja, minta diri empu gerai nyamai tau suman enti sakit raya. Tempak ke selalu sida nampuk iya nya baka batu anchau Telaga Kumang, pun kayu tapang penepan Raja Nabau, pun kayu ara tempat antu Gerasi, lubang gua endor Bunsu Remaung, tuchong bukit endor orang tuai ke berita mati dirarong begulai enggau orang Panggau. Ari nampuknya Iban kelia pechaya ka antu tau nulung sida dalam mimpi nitihka utai ke disampika dipinta sida. Sida kena sumpah antu asuh antu gerai enti sakit. Sida disumpah antu kaya-raja, tau padi, berani ensali tau serang, kering, kebal, gayu nguan menoa. Maia nampuk maioh penguji deka datai sebedau antu ke manah datai nulung kitai. Ular lemayar baka ke deka ngetup kitai, ai bah baka deka ngulu kitai, kayu rebah baka deka ninggang kitai, batu galang bebelat baka ke deka nuju kitai. Enti kitai rari ketegal semoa utainya, pengawa kitai nampuk puntan enda nyadi nadai bulih utai. Kadang kitai kena sumpah antu ke jai ngasuh kitai merinsa, gila, tuyu, indup enda menyana.

Enti mimpi manah, Iban kelia ngaga keduran miring rintai sembilan tauka tujuh, nyambut mimpi awakka bisa nyengena, enda subau enda rumbau. Mimpi ke manah iyanya baka betemu enggau bunsu Remaung, Raja Nabau, Keling Bungai Nuing, Kumang Indai Abang, Sengalang Burung enggau Sempulang Gana tauka orang tuai ke berita benama. Sida nya nyumpah tauka meri pengaruh ngasuh kitai bulih utai, kaya-raja, berani tau serang. Pengaruh ke diguna Iban kelia iyanya baka rajut-kirai, pematak serang batu ungun kena numbuhka pedilang penyalai antu pala nyadi ketuai kayau, taring babi nyadika empias enggau kebal serta pengering, batu kampa awakka enda ulih peda munsuh tauka antu jai, penampung tulang ngambi enda ikak, penchelap awakka gerai enda sakit-rengit, pedera renga, nadai utai ngawa.  

Terubah, manang ngena batu ilau iya ninjau dini penunga semenggat orang ke deka dipelianka. Arinya iya nemu tunga enggau penyauh semangat orang nya serta atur pelian iya. Pengelama belian nitihka penusah ngiga lalu nangkap semengat mai iya pulai. Kadang-kadang semangat mensia udah diempa antu gerasi nya ke tusah dilaban manang. Maioh manang enggai ngereja nya enti semangat nya udah ba antu gerasi. Sida begadai nyawa ngelaban antu gerasi. Dia kitai selalu meda manang luput maia belian. Dia sida minta bunuh ka babi engga piring besai agi nyanding pengawa.. Manang maioh ngibun pengaruh ke enda manah baka ngasuh indu badu beranak, jayau, pengaruh munuh orang, sakang enggau antu buau kena munuh ngemediska orang.

Manang bisi sampi enggau timang iya empu kena iya belian. Sida selalu bebungkur enggau pua kumbo lalu megai manuk enggau duku. Ba tegah bilik diengkahka iya kelingkang pun pisang endor engkah pengaruh, lupong enggau pedara. Manang nimang belian ngelingi kelingkang semalam malam. Enti manang luput enda tau ditegu takut ka jelungan, semangat iya pulaika menoa baru. Iya ke luput nya laban nangkat semangat ari jari antu ke ngachau. Udah semangat ulih, manang ngeleda lalu mai indu utai baka kutu ke mangkuk isi air enggau beras. Indu utai nya kumbai iya semengat kitai mensia. Udah manang besampi baru iya ngelamka indu semengat nya ngagai pala orang ke dipelian, nyimpan semangat ngagai tubuh kitai mensia. Orang dipelian enggau sida sebilik lalu dibiau enggau manuk. Nya  ngujungka pengawa manang nangkap semengat.

Manang diupah nitihka pemesai pengawa iya, tang manuk, papong besi, kain ila enggau pinggai sesingkap endang sigi adat pemali manang belian. Manuk kena manang miau iya empu awak ke gerai. Pingai sesingkap kena nangkup pala retinya kena mulaika semengat manang ke udah belelang ngiga semangat orang ke sakit. Besi nyadika pengering tubuh manang retinya besi kena manang ngeringka semengat iya ari kachau utai. Kain ila kena manang betepas retinya kena manang nepas utai ke jai bisi udah dikerja iya maia belian. Lupong kena manang engkah pengaruh enggau utai kena iya belian.

Selalunya orang ke dipelianka manang iyanya orang ke sakit. Laban ba penemu Iban kitai sakit laban semengat kitai nyau udah midang ke sebayan. Bisi ga manang muai buyu. Retinya Manang munuh tauka muru antu ke ngachau semengat bini orang ke bisi buyu. Indu ke bisi buyu selalu enggai beranak. Iya enggai tinduk enggau laki iya, tang iya asai ke bisi orang enggau tinduk. Manang ninjau enggau batu ilau ngabas buyu orang. Udah nya baru iya madah penama buyu orang nya. Buyu retinya ruh antu tauka jelu beambai enggau bini orang. Ruh tu maioh datai ari jelu nyumbuh, mayas, kera, babi, antu gerasi tauka ular nabau.

Maia belian ka buyu, semengat manang bejalai ngiga buyu lalu munuh buyu. Enti buyu nya nyumbuh nya kitai selalu meda nyumbuh tak mati diri enda jauh ari rumah. Kelia Iban enggai nyimpan nyumbuh takutka nunang bini orang nyadi antu buyu. Nya pengawa ke jai. Keba orang ke jai ulah dikumbai baka nyumbuh.  Pia mega kera, belalang enggau jelu bukai. Enti buyu nya antu gerasi kitai deka ninga antu nyeru, hari ujan nyala. Enti buyu nya ular nabau kitai meda hari kudi, ujan lebat enggau ai bah. Nya nandaka sida datai dikangauka manang maia belian. Manang ke berani iya enda takut laban iya nemu diri ulih munuh antu nya. Tang enti manang ke lemah iya takut lalu enggai belian ka buyu Antu gerasi enggau nabau. Maia bebuai buyu pagi hari indu ke dipelian kena tepok enggau asap, bisi nya kena tanjah enggau ai sampi manang begulai enggau bungai tujuh macham.

Tuju manang berua sebaka enggau manang belian. Sida ngiga semengat orang ke diperua. Belian enggau berua nyauka sebaka semina iya ke berua semina berayun ba mangku panjai, enda musin kelingkang. Iya berua nimang ngena jalai manang apus malam megai manuk. Pagi ari baru iya nyimpan anak semangat ngagai orang ke empu tubuh. Tu dikumbai Iban ngempung semengat. Kebuah Iban berua kelia, laban selalu jai mimpi, selalu belaya diri sebilik, selalu renga enda tentu pengerai, anak alah ayu retinya selalu renga tauka sakit tasal tubuh. Iya diperua lalu ditukar nama.

Lebuh nyadi manang sida bisi mimpi tauka dibangunka manang bukai ke tuai ari sida. Kemaioh sida ke bemimpi nyadi manang enggai nyadi manang tang antu manang dalam mimpi sida selalu nyumpah sida jai nasip, sial, gila tauka mati enti sida enggai nyadi manang. Dalam mimpi sida asuh antu manang nyadi manang, baka Ini Manang Lunyung. Sida mega selalu diberi antu manang pengaruh nyadi manang baka batu ilau, batu antu buau, sakang, ambar mati enggau maioh ubat bukai. Semoa ubat nya ulih sida empu, diambi dalam mimpi. Antu manang madahka sida tuju ubat siti-siti.

Mangun manang pengawa ke besai serta tusah dipeda kitai idup tu. Sida selalu ngereja utai tu jauh ari orang ba babas. Orang deka nyadi manang bekenaka kain orang indu. Keba jako tuai, enti orang laki ngena pekayan indu, selalu ngereja pengawa indu dikumbai manang. Sida bepantap ka tubuh diri empu, makai darah enggau dagin manuk mata. Sida beunsut darah ambih tubuh. Sida ngiling diri enggau tikai lalu nunu diri. Sida bepalu pangan diri enggau kayu sampai meredup tubuh. Sida mega makai ilum pinang. Sida besampi nitihka timang sida empu. Sida lalu bedara besampi atas tulang perabung. Ba tulang perabun digaga orang tanju endor mangun manang.

  

Mimpi jai tauka burung jai enti nyelinting kitai serumah, selalu diaduka orang tuai enggau piring ampun. Iyanya sekayu rumah bela nganjong piring udah ngagai tuai rumah. Tuai rumah bedara ngaga keduran. Piring-udah, udahnya anjung ngagai langkau ampun ke nyentang jalai pemandi pelah kulu enggau kili. Enti mimpi tauka burung nya jai agi, piring ampun digitang nyentang sungai. Manuk siko enggau babi siko dibunuh kena ngampun.

Sebedau begawai tauka ngaduka pengawa ke besai Iban kelia selalu ngaga keduran lemai ke dikumbai ngampun. Pedara maia tu iyanya rintai tiga nya adat ngampun antu kepapas. Reti nya Iban meri antu kepapas makai dulu awaka enda ngachau maia begawai tauka ngintu pengawa ke besai.

Udah abis pengawa ngampun, sida sekayu rumah mambut, ninggalka rumah panjai beberapa bulan. Kadang sampai setaun. Sida ngaga rumah sementara enda jauh ari rumah panjai. Utai ke penting dibai magang. Semina babi-manuk aja agi tinggal ba rumah.

Tu sekeda leka biau mimpi jai;

Nya dek telu matu,

Dek anang bula anang ampa,

Dek asuh kami ngesai muai mimpi kami ke jai,

Ngupas ngendas utai ke jai, utai ke banchi ba kami,

Buai ambih buai lengih ulih dek,

Anang bula anang ampa,

Anang subau anang rumbau,

Antu ke deka ngachau kami asuh busung lunggung,

Tulah tapah enti iya ngachau kami.

Kami gerai nyamai nadai apa nadai nama.

Maia muai tuak maia miringka antu kepapas, Iban besampi munyi tu:

Nya ngirup antu kepapas, dek udah dipiring ka kami,

Dek anang ngachau anang ngeregau pengawa, gawai kami.

Busung lulung, tulah tapah dek ngachau kami.

Betara udah ninga antu udah nemu kami besampi.

Maia orang makai kitai enda tau enda ngetu dulu anang terus bejalai, mali puni tau ngujungka nyawa kitai lesi kena tinggang penusah. Kitai mesti negu utai ke dempa orang. Abis kurang kitai ngetup tunjuk lalu besampi munyi tu;

Negu aki, mali puni selama iya.

Antu enda nemu Betara enda ninga.

 Aku udah negu, nama utai enda udah ditegu jari tu.

Tulah tapah antu enti ngasuh aku puni,

Enti kitai puni semoa utai tau nyadika penusah magang. Antu meda kitai baka jelu. Ular, lemayar, jagu tau nganu kitai magang. Tang enti kitai negu kitai nadai tinggang jako puni, nadai tinggang penusah. Antu deka ngachau kitai kena tinggang penusah ukai kitai. Kitai gerai nadai apa nama.

Jadi Mali.

Enti bisi orang ngereja utai ke salah baka ngandung ngampang, butang enggau jadi mali, Iban mudas menoa. Jadi mali retinya Iban jadi enggau diri menyadi tauka menyadi diri sepiak, petunggal sekali tauka dua kali. Jadi mali mega bagi Iban ke jadi enggau tanah anak, tanah aya tauka tanah Ibu. Ngandung ngampang reti nya indu ke rumpas nadai laki tak ngandung, betubuh bisi. Anak ke adai dikumbai anak ampang, nadai apai. Kelia Iban nangi jadi enggau anak ampang, enggai bai iya bedusa. Orang ke salah ngandung ngampang, jadi mali tauka butang dipinta adat mudas menoa iyanya manuk siko, babi siko enggau besi. Babi enggau manuk tu kena nyengkelan menoa awakka enda kusi deka tumbuh utai. Buah deka bebuah, padi deka nyadi, menoa enda kudi.

Taja pan ditagang jadi mali, maioh Iban enda beduli. Arinya tuai Iban kelia ngubah adat ngukum ngena adat mudas menoa. Sida diberi adat betimpang enti iya tanah aya, ibu tauka anak. Retinya ngenau ka iya ke ka jadi enda mali agi. Lalu orang kulu-kili pan enda tau bejako besebutka nya agi. Sapa ke nyebut nya tau kena ukum ke besai. Sida ke jadi mali nadai dibunuh agi, tang maioh orang enggai serumah enggau sida. Tu ngasuh Iban ke jadi mali tinggal idup kediri lalu ngagaka diri empu kelompok pendiau. Arinya sapa ke nemu diri empu jadi mali maioh rari enda bepadah ngagai apai indai lalu nampil orang tu. Sida tu kelia maioh diau ba pengirup ai retinya entigis sungai ke nadai orang diau, ba menoa ke renjan. Di Batang Ai sida tu maioh diau ba ulu Engkari enggau Lemanak.

Kemaioh agi orang ke jadi mali tu purih orang ke tau tepang laban udahnya sida bisi kena tepang antu kejatan ngenchuri utai orang lalu nemu ngasuh pendiau pengidup orang enda tau beranak luchuk serta ngasuh utai tanam rumbau. Jako “Tau Tepang” tu mega kena orang kelia nyeliahka jako nyebut purih orang ke jadi mali. Nya kebuah Iban kelia nangi begulai enggau purih orang tau tepang. Sida deka agi begulai enggau purih ulun orang. Enti orang tau tepang ngerara buah mansau tauka padi mansau, hari siti buah enggau padi orang nya tau rarah gugur kediri iya empu. Enti orang tau tepang ngerara anak mit nya sigat tauka bajik, udahnya orang ke empu apai-indai enda ulih agi beranak. Enti orang tau tepang ngerara padi maioh ba tibang tauka ngerara beras maioh ba benda, padi enggau beras nya tau tumbuh nadai agi dalam tibang tauka benda. Tu utai ditangi serta ditakut ka orang kelia ngagai orang tau tepang.

Enti orang ke ngandung ngampang enda dipudas, Iban pechaya buah deka rumbau, padi enggai tumbuh bebuah manah, menoa kusi nadai jelu enggau ikan. Menoa selalu kudi, rebut balai, hari ujan, tanah tusur, ai bah ngampuhka menoa. Mensia mega nadai tentu pengerai. Orang ke beranak tau enda nyadi. Mensia selalu mati kenyap. Kena tinggang kandung kenu. Tu tau ngasuh laya ke besai laban orang ke tinggang penusah baka tu deka bebalas ngerampas bilik orang nya tauka munuh orang nya. Agi kelia orang ke ngandung ngampang bakatu tau enggau orang ke jadi mali sigi kena ukum rejang. Sida takut ke iya ke jadi malinya ngudi menoa ngasuh rumah anggat, orang mati beterudus-untus enda ngetu. Indu direjang enggau buluh tajam, laki diram kedalam ai sampai mati. Keba di Lubok Antu bisi siti tempat dikumbai batu bebini, ke endor apai enggau anak jadi mali diukum rejang nyadi batu.

Ulun

Kelia Iban selalu begigaka ulun. Sida ngayau ngagai menoa orang lalu nangkap orang dibai pulai diambi nyadi ulun. Orang ke tangkap nya enda milih, indu tauka anembiak, besai tauka tuai. Bisi mega Iban ngambi ulun ketegal orang nya udah ngereja utai salah ngagai sida tauka enda tebayarka utang baka nganguska rumah, nganguska langkau umai enggau maioh penyalah bukai.

Ulun nadai diberi gaji. Sida semina diberi makai aja tang kerja keras ngereja utai ke kamah serta berat ke orang ke empu ulun. Iban kelia sampai dua puluh iko ulun. Bala ulun tu ke bumai, ngasu, nyala, ngambi kayu, nutuk, beban, berumahka orang ke beulunka sida. Tuan sida baka raja.

Dudi tu ulun udah dikemaduka perintah. Tang orang agi keji jadi melaki bini betampil beringap tauka berumah sejalai enggau orang ke purih ulun. Tu ngasuh bala ulun tu pindah ke menoa bukai ninggalka tuan sida tauka bebini belaki kebukai. Maioh sida tu jadi enggau orang tau tepang laban nya orang ke nadai milih orang ke enggau beringap. Sida enggai temu orang purih-pantih.

Ngemaduka ulun dikumbai adat Temang. Retinya orang ke empu ulun ngambu ulun iya nyadi anak lalu begawai madahka orang kulu kili besumpah badu agi ngambu orang nya nyadi ulun. Kaban belayan orang ke diulunnya dikangau magang mending ka randau serta meda nyadika saksi adat temang. Sida bepegaika sangkuh ba orang maioh ngerejang babi siko madahka sapa orang agi besebutka ulun tau direjang enggau sangkuh baka babi nya. Sangkuh nya lalu diibun tuai bilik ke ngibun bilik besai orang ke empu ulun.

Indu Ribat.

Maia bini ngandung Iban kelia bepenti. Bini enggau laki maioh utai enda tau kerja mali anak menawa. Reti nya anak timpang pendiau baka chachat, buta enggau isu. Pengawa ke enda tau amat dikerja orang ke empu bini ngandung iyanya munuh jelu. Munuh orang tau ngayuka anak tau serang. Nya kebuah ba ensera Iban betara sida ke benama Keling ngayau maia bini iya Kumang ribat. Mechah ka telu enda tau maia bini ribat laban nya ngayuka anak tau buta. Megai utai timpang ngayu ka anak chachat. Enda tau malu pala, netak dilah jelu, laban mali anak isu. Enti enda ulih di kelaung ngereja pengawa, orang bukai asuh dulu udah nya baru tau ditangkan orang ke ngibun bini ribat. Bisi sekeda mantangka paku ba pintu awak ka anak lekat enda mati lulus. Tang maia beranak paku nya mesti dibuka takutka anak lekat enggai pansut, ngenusah iya ke beranak.

Maia bini ribat Iban selalu belelang nunda pengawa Keling. Sida ngiga utai ke dketengukka bini. Laban bini ribat selalu nyera. Sida maioh utai diketenggu deka dipakai. Bisi sekeda deka makai jelu jangkat, bisi deka makai asam, bisi deka makai batu lemak. Tetengguk ka jelu jangkit nya ngayuka anak lelaki. Tetenggukka asam ngayuka anak indu. Bini ribat tetengguk ka utai nyelai ari orang bukai baka batu lemak nya ngayuka anak deka idup nyelai lebih ari orang ba pengidup. Ngayuka anak deka pintar ngidupka diri.

Orang ribat selalu betangas, steam bath ba jako kemaiaritu sampai maia sida udah letu tubuh ambih pantang udah beranak. Sida milih daun mambung, daun lia enggau tepus. Sida beunsut enggau lia awakka angat tubuh. Sida mega sedia ngaga pedilang ba bilik endor bini bekindu. Unggun ditugungka maioh dulu sebedau bini beranak kena bekindu. Bisi sekeda malu tekalong dulu nyendiaka bedong indu ke baru udah beranak. Keba jako Iban, nyindir laki ke enda nemu sedia ngaduka semoa pengawa. Bini beranak baru malu bedong. Dekat nak kahwin baru besunat, ko Melayu.

Lebuh indu beranak sida nuntungka tawak ngasuh bala bidan sida serumah datai nekan orang ke beranak lalu bepadah ngagai sida ke benung dalam babas tauka umai. Nya dikumbai betekan. Udah anak ada tawak dituntung baru ngayuka anak udah ada serta ngangauka betara. Anak laki selalu disambut enggau piring tujuh. Sida ke laki enda diasuh meda orang betekan semadi iya nyadi manang tauka beliau muchau ngasuh orang ke beranak nya muntang agi beranak enda pedis. Ditu meh sida ke bisi ubat mudah beranak beunsutka ubat mudah beranak, meri ubat benta awakka indu ke beranak enda jukat.

Kayu idup dipelintang ba jalai pendai enggau kaki tangga madahka rumah agi bepenti ka orang baru udah beranak enda tau ditiki temuai. Laban temuai ari rumah bukai deka ditunggu enti niki rumah. Tunggu nitihka adat rumah siti siti. Tang manuk, besi, pingai sesingkap enggau beras basah mesti bisi. Nya kena bebiau, mudas menoa, ngampun ngagai antu. Bedong dibelit ngelinggi punggung orang ke baru udah beranak awakka enda labuh serangan anak. Iya mega asuh ngirup ai lia awakka anggat tubuh enda benta. Lauk orang ke baru udah beranak deka dipilih, laban sida enda tau makai jukut enggau pansuh. Keba sebedau bini beranak sida ke laki begiga dulu, nyalai ikan, nyalai babi, nyalai jelu babas serta nupi manuk. Sida mega ngaga gelukos. Maioh sida besaup ngereja pengawa nulung bilik orang ke deka beranak. Sida beberika manuk, salai, unggun enggau utai bukai.

Kira seminggu udah nya, udah tampuk pusat gerai serta anembiak mit ke baru adanya tau menchelak, orang kelia ngaga keduran baru ngayuka iya udah tau nengkila, meda ngelala dunya. Laban sebedaunya anembiak mit nya agi bedau enchelak agi idup baka dalam ruh. Tampuk pusat enggau temuni orang ke beranak dianjung ke babas ditumbak enggaika dikachau utai. Penti rumah enda tau ditiki temuai pan dibuai. Maia tu mega sida ngaga ka anembiaknya nama. Sida ngiga manang berua nentuka nama. Nama dipilih ari nama aki-ini, purih-pantih sida empu. Maia berua nya manang megai manuk lalu manuk nya asuh mantuk beras ke udah dipelian ka iya madahka nama ke deka digaga. Enti manuk nya deka mantuk beras nya reti nya nama nya tau dikena betara ngasuh. Enti manuk nya enggai mantuk beras ke dipelian, reti nya nama nya enda tau diberi ngagai anembiaknya, antu manang nya enda ngasuh. Sida ngiga nama baru lalu dipelian ka baru sampai manuk deka mantuk umpan ke dipelianka. Kadang-kadang enti anembiak nya selalu nadai pengerai, sida ngiga manang baru berua tauka belian nukar nama anembiak ke selalu enda pengerai. Tubuh tasal enggai mansang, alah ayu kenu. Retinya semangat anembiak nya bisi utai ngachau.

Beberapa bulan udahnya,  maia indu ke beranak udah regas serta gerai lalu anembiak nya baru tau singgit iya dianjung orang mandi. Tu pengawa ke besai laban kaban belayan kuli kili dikanggauka magang. Sida ngaga piring tujuh. Munuh manuk kena bebiau lalu munuh babi ba ai kena nyelapat anembiak nya mandi betemu enggau bunsu gendali. Ditu sida ngunsutka pengaruh rajut ngagai anembiak ke baru adai awakka berani bulih utai. Orang ke nganjung anembiak mandi deka dipilih, ngiga orang ke berita benama awakka iya tau berita benama baka orang ke nganjung iya mandi. Keba anembiak udah besai deka nanya apai indai iya, sapa orang ke nganjung iya mandi maia agi mit kelia. Enti anembiak nya bulih utai baka iya ke meri iya mandi, iya deka dikelalau jako orang. “Nya meri sano nya berita bulih utai, aki sano meri iya mandi, berita benama baka aki sano.” Nya jako.

Begotong-royong.

Semoa utai kerja begotong-royong besaup pangan diri nadai begaji minta upah. Ngupas ai, nebas jalai kumai, ngaduka jalai pemandi, nugal, mantun, berangkut, nungku, nutuk semoa begulai madang tauka beduruk enggau panggan diri. Beduruk reti nya kitai kerja ka pengawa orang bukai udahnya orangnya  malas kerja enggau kitai nitih ka berapa hari kitai kerja ka iya. Pengawa enda tentu sama tang hari kerja sama. Iya ke indu enda tau nebang tang iya ulih nuruk orang laki nebang umai ka iya ngena chara malas baka nutuk padi nulong bini orang ke laki.

Maia nubai, ngembuah, begiga enggau ngerambang Iban kelia begulai bebala maioh diri serumah. Sida berandau dulu besemaia hari enggau panggan diri. Tuai ke nguluka pengawa dipaduka. Malam bedau nurun sida ngaga keduran dulu minta tuah limpah ari petara awaka muntang bulih utai. Semoa utai ulih dibagi bela nitihka tubuh enggau pintu.

Begiga retinya sida ngasu ngiga ikan, babi enggau jelu bebala maioh sebelah kampong. Sida bemalam ngaga langkau arau ba babas sampai seminggu bebai ka bekal. Bisi sekeda bebaika orang indu enggau berapi. Ngerambang retinya sida nyala ai bebala maioh. Lebuh ke ngerambang tu enti ai langkang, ai sungai selalu dikeruh sida dulu awak ka ikan enda ulih meda lalu nyamai ditibar sida. Ngeruh ai reti nya sida nusurka tanah tebing sungai lalu unsai enggau ai awakka sungai keruh. Pengawa bakatu selalu dikerja sebedau gawai kena nyendiaka pemakai bala pengabang.

Ngintu Pemati.

Ngintu orang mati dua chara ba adat Iban. Iyanya disengai enggau enda disengai. Orang ke enda disengai iyanya orang ke dirarong. Kemaioh agi sida tu orang ke laki ke berita, benama, berani, tau adat, bulih utai tauka anak laki orang nya.

Dirarong retinya orang nya mati enda tau disabak. Bangkai iya selalu dianjung ngagai tuchung bukit enda ditumbak semina diraran. Bangkai iya ke mati disimpan dalam sentubong lalu sentubong nya digaga raran endor mangaika sentubong. Kebuah pia awakka ruh iya ke mati nya tau nulung sida ke dudi idup. Keba maia begawai Iban kelia selalu ngangau sida ke mati. Sida mega nganjung piring udah ngagai tuchung tempat sida ke mati dirarong.

Sida ke mati dirarong enda diulit. Sida begawai, begendang, rami makai, ngirup, bemain maia ngintu pemati. Orang nganjung antu ngena tawak betabuh. Sida miring rintai lapan lalu munuh manuk enggau babi kena bebiau enggau mudas tanah, nyengkelan pendam. Sida enda takutka antu sebayan maia tu.

Sida ke mati disengai anjung ngagai pendam. Selalunya pendam ba tebing ai enda jauh ari rumah. Maia ngintu pemati orang sekayu rumah ngulit magang enda tau bemain, manjung, ngajat enggau bepantun. Sida jenuh nadai bisi pengawa. Semoa mensia takut laban sida pechayaka antu sebayan bekeliar aja datai ngambi ruh iya ke mati. Semoa mensia tinduk ba ruai takut tinduk ba bilik. Rumah diempang enggau kayu idup nandaka rumah mali ditiki temuai. Ari kayu idup nya temuai nemu pengelama orang udah ngulit. Sida meda pengelayu daun. Antu disengai dua-tiga hari. Bisi ga sekeda dilantar, retinya terus anjung ke pendam enda bemalam niki rumah. Orang nganjung antu dini ari sebedau matapanas terbit. Sida nabuh tawak awakka enda ninga burung ke jai.

Bangkai orang ke mati selalu dianja ngena ngepan kitai Iban. Bisi sekeda ngena mas, marik, engkerimuk, simpai enggau baju sungkit tauka kain sungkit. Sekeda dibap enggau pua kumbo. Semoa orang ke mati mai baya. Ambih iya nadai anak jaguk. Bangkai dibungkus enggau tikai lalu bai nurun tuju tanju orang ke empu pemati. Enta tau bai niti ruai mansai ruai orang bukai. Udah nya disan ke perau lalu anjung ke pendam. Datai ba kaki peniki pendam, bangkai diengkah ba tempat endor nanam serta nganti orang tembu beban ngaga sungkup. Sekeda mupuk numbak lubang. Sungkup digaga maia nganjung antu. Nyadi tu kebuah kayu ba pendam suku kaum Iban enda tau dikachau dulu kelia. Laban nadai dikena maia suntuk nganjung antu bakatu. Udah sungkup tembu, bangkai dibungkus lalu simpan dalam sungkup serta ditanam dalam lubang ke udah ditumbak. Lubang gaga dalam takut ka dikachau jelu babas.

Maia pulai nengah jalai bukai takut ka antu sebayan nitih. Orang ke nganjung antu asuh meraka uduk ba tanah laman sebedau niki rumah laban antu sebayan takut ka uduk lalu sida nikal enda enggau niki rumah. Lemai hari api ditungkunka ba peniki jalai pendam. Tu awakka ruh iya ke mati enda nikal baru tembu rindang bekindu ba api. Datai ba rumah sida berandauka adat ngulit serta adat entabalu laki tauka bini orang ke ditingang  penusah. Maia ngetas ulit sida bekangau diri semenoa. Ngaga piring tiga. Buk iya ke ngulit dikempat mimit lalu engkah ba pingai. Udahnya ditunu.

Maioh sekeda Iban nguji orang ke mati ngena bejalai kebabas maia iya disengai. Sida ngasu tauka nyala. Enti orang ke mati nya manah sida tau bulih utai enggau muntang. Utai ulih dikena mensia maia ngintu pemati. Barang utai dipakai enda tau dibai ngagai ruai bukai maia ngintu pemati. Sida takut ruh iya ke mati nemuai ngagai bilik bukai lalu mai semengat orang bilik sepiak pulaika sebayan.

Bisi sekeda Iban ngena adat ngenuling ngintu pemati. Retinya iya ke empu pemati minta pala basah. Sida serumah ngaga kayau anak ngiga antu pala agi bedarah kena ngetas ulit. Adat ngenuling, tu besai laban iya begunaka maioh piring, babi, manuk, teluk kena miring. Iya mega begunaka utai keras kena ngetas ulit diberi ngagai orang ke bedengah. Retinya begunaka tawak tauka tajau ke baya orang ke mati.

Sepuntang leka sampi ke ngangau ka ruh orang ke mati dirarong ba tuchung;

Kami ngangau ka Chabo tuai dulu mungkal dijabong ke diau di ulu Pangin Sungai Gerenjang,

Kami ngangauka Imba apai Kelibai ke udah nadai di tuchong Kasai Sungai Senentang,

Kami ngangau ka aki kami Ngumbang ke diau di tuchong Pan bukit Kelingkang,

Ngangau ka aki kami Pateh Ambau ke diau di Tabau, emperan Gerunggang,

Nya baru kami ngangau ka Belayong di endalan Belitong, ulu Barang,

Bebini-Belaki.

Iban bebini belaki maioh chara. Kemaioh agi “jadi keran” kedeka sida empu. Jadi keran reti nya indu enggau laki bela deka keran ka pangan diri lalu jadi enda nanya apai indai dulu. Maia ke ngayap, indu lalu nitih ka orang laki. Bakanya ga laki ngayap lalu “ngalika diri”. Retinya laki ngugi nguai ka orang indu enda bepadah ngagai apai indai dulu.

Adat belaki-bebini ke meruan iyanya, laki ngayap orang indu ke dikumbai ngabas. Iya diasuh apai-indai iya ngayap ngagai indu nya. Lebuh ke ngayap, laki nya ukai ngenani ka indu aja tang mega ngerak sida sebilik. Udah sida sebilik dani magang baru sida berandau. Ngayap tu kadang bisi dua tiga malam nganti bulih jako ari indu enggau sida sebilik. Laki ke ngayap nyadi ka pelatar jako apai indai indu enggau laki. Chukup randau baru apai indai laki datai nganjung Bentak Selong ngagai orang indu. Sida besemaia ka hari deka ngambi indu. Udahnya rumah panjai indu enggau laki sedia dulu nutuk pulut, numpi, ngerendai,  ngaga tuak, begiga dulu ngiga ikan babi kena rami. Anak ke mereti serta ngasika jako apai-indai kadang-kadang asuh orang belelang ngagai menoa bukai tauka begiga ngagai kampong begulai engau bakih mandal iya enda ibuh enggau ngambi indu, nangi ka diri dikumbai orang kelalu gagit deka bebini.

Lebuh ke ngambi indu tu sida bekangau ka kaban belayan. Sida betabuh bebala maioh. Sida ngaga keduran lemai ngampun ngagai petara awak ka pengawa mutang nadai utai nangul. Sida bebiau munoh manuk sebedau nurun. Sida mai kayu burung, lebih agi paung nendak awak ke chelap. Sida mega mai utai ke dipakai enggau diirup ngintu pengabang. Kadang sida mai pemeri.

Maia datai ba rumah panjai orang indu bala orang laki disambut enggau tabuh enggau gendang. Disibur enggau ai tuak baka ke niki ka pengabang maia begawai. Sida mega dibiau enggau manuk serta disengkelan enggau darah jani ba kaki tanga. Orang ke niki, indu-anembiak, besai-tuai bela bekenaka pekaian ngepan kitai Iban. Sida asuh orang niti ruai tiga kali besundang. Lebuh ke niti ruai sida disibur orang rumah panjai pelah ke indu enggau tuak.

Kadang-kadang bala laki tu diempang orang enggau kuta ba ruai kaban belayan indu ke mandal. Sida ngaga uti minta utai ari bala laki. Kuta selalunya diempang ka orang tali nyentang ruai begulai enggau tawak, sangkuh, terabai, pedara dibap enggau pua kumbu. Bala laki enda tau mansa ngapa enti bedau muka kuta nya. Sida ke muka kuta nya pilih orang ke bisi agi utai laban maia muka kuta, bala laki mesti ningalka pemeri. Enti bala indu enda puas ati ka pemeri sida bedau ngasuh mansa agi minta. Kelia pemeri iyanya tajau, tawak, bebendai, pua kumbo enggau antu pala. Diatu Iban nyau begunaka duit magang nyadika pemeri. Pemeri antu pala adat ke paling tinggi. Retinya kitai berambunka nyawa muka kuta ngambi indu. Adat tu dikumbai orang mutuska ranyai tauka ngusaika kuta. Ditu bala indu enda tau enggai takut kena adat serta sumpah ruh orang ke empu antu pala.

Ketiga kali niti ruai sida asuh orang duduk ba ruai orang indu. Maia lemai hari sida berandau. Utai ke dikerandau iyanya pasal adat, nguai enggau purih pantih ari sepiak-sepiak. Tu utai diketangi sida ke enggai ngintu adat bebini-belaki betanya bepinta baka tu, laban sida nangika purih diri empu ditemu orang maia berandau enti purih sida bisi timpang. Udah randau enggau adat chukup, sida lalu miring serta rami. Pagi siti indu lalu dibai. Bala kaban belayan orang indu enggau sida serumah bela dikanggau enggau ngabang. Ba rumah laki baru orang melah ka seduai pinang jadi melaki bini serta rami sekayu rumah begulai enggau bala pengabang ke bisi datai.

Siti da adat belaki-bebini iyanya adat tangkap. Adat tu selalu dikerja orang ke berani, kaya, berita, benama. Sida ngasuh anak laki sida ngayap indu ke deka ditangkap. Lebuh ke ngayap bala apai indai indu nya setuju ka anak indu iya jadi enggau laki nya. Awak ke bisi rita didinga ditusi orang, dia bala apai-indai laki ngaga adat tangkap ngambi indu. Sida ngipa bala indu enda ngadang. Sida bebaika tuak, arak, babi, manuk, bebendai, tajau, tawak enggau antu pala. Sida mai senapang, sangkuh, terabai, duku baka orang ke ngayau.

Kira dini hari sida datai lalu mangkung tawak serta tama bilik indu. Siko laki ke kering lalu ngesan nabanka indu. Sida manjung minta digagai bala indu. Ba bilik sida ningalka tawak selebuan. Ba kaki tangga sida ninggal ka tajau selebuan. Udahnya sida ngetu ngiga kerangan ke manah nganti orang ke empu rumah datai nitih.  Orang ke ngempu rumah lalu begau baka ke bisi munsuh datai. Sida beradu bekena ka ngepan Iban baka orang ke deka ngayau. Indu anembiak bela enggau magang nitih ka bala lelaki. Datai ba karangan ke endor bala laki nganti sida lalu berandau, ngirup makai rami dia. Sida besemaia hari ke melah pinang. Sida miring, munuh manuk bebiau, munuh babi. Dia sida ningalka semoa pemeri ngagai orang indu. Enti uti bungah agi bala laki pinta gagai bala indu agi. Sekali tu bala laki ngulur ka antu pala kena ngetan ka indu. Datai ba rumah laki sida rami.

Ngena adat baka tu bisi dua kali udah nyadi ba Iban Batang Ai. Tuai Rumah Empurung ngambi bini iya Jayap ke ulu Katibas ngena chara tangkap. Kaik anak Pengarah Jimbun ulu Delok ngena chara nangkap ngambi bini iya Laung ba ulu Menyang.

Ngayau.

Ngayau mulau nya pengawa Iban ke penting serta manah amat kelia. Sida ngiga antu pala ngerampas reta enggau menoa orang. Sida ukai ngetan ka diri empu ari diserang orang. Pengawa bumai, betanam betupi, ngasu beburu, bekuli ngiga reta nya pengawa lumor dua. Empa pengeran Iban deka ngayau ngiga antu pala ari ke bumai dia Iban selalu ninga bini sida nganu laki sida munyi tu. “Dek sanu nadai kerja bukai tak ngayau aja-aja. Umai enda ditati. Tu dek enggai bai aku bumai. Dek anang pulai ngapa enti bedau teulihka antu pala penuh ladung.” Arinya laki sida bebunuh penatap inat enda tetatika diri empu mati. Sigi ladung ambih iya nadai dua puluh igi pala. Kati ko kitai siko telaban ka orang maioh nya. Pengawa ngayau tu nenak agi ditusi siko Iban Batang Ai ke kala enggau orang ngayau mandang ditu.

Siti kayau ke dudi amat belaku ba menoa Batang Ai iya nya dikumbai orang Ngayau Mandang. Iya nyadi dalam tahun 1950an ari siko orang ke diau ba rumah Pengulu Ngali di Nanga Delok nemuai ke kaban belayan iya ba Emperan, Besayah, Kapuas menoa Indonesia. Nyadi nama iya iyanya Belayung (tu ukai Belayong berani maia Bantin). Lebuh tudah Belayung datai ba Emperan dia Belayung lalu diinsah Langai di Emperan. Ketegal nya Belayung lalu buta mata kedua-dua belah piak. Udah iya buta, Belayung lalu dianjung Langai pulai sampai ngagai antara menoa. Langai lalu nangkan Belayung enggau jako.

“Di pulai Belayung. Kita Batang Ai asuh ngayau ngagai kami di Emperan. Padah ngagai Pengulu Ngali seduai Pengarah Jumbun. Enti seduai enggai tu kain asuh pasuk ka seduai. Tu tubai asuh empa seduai. Nya tu keresik kena ngira bala kita ngayau kitu.” Ko Langai nangkan Belayung.

Datai di rumah sida ba Nanga Delok, udah bekau ditemu orang ba babas, Belayung lalu nusi berita diri ke dijamah bala sida ari Emperan lalu nusi cherita orang Emperan ke ngasuh orang ari Batang Ai ngayau. Kain, tubai  enggau keresik ke diberi Langai bisi dibai Belayung lalu diberi iya ngagai Pengulu Ngali. Kebuah Langai tu nginsah Belayung laban sida ngumbai Belayung tu nyadi patau menoa endor orang Batang Ai ngayau ngagai Emperan. Tang iya ke bendar Belayung endang sigi deka nemuai ngagai kaban belayan iya di Emperan. 

Ketegal nya Pengulu Ngali seduai Pengarah Jimbun lalu ngeredingkang ngaga bungai jarau bepadah ngagai bala maioh. Bala ari Skrang, Lemanak, Engkari enggau nambah bala ari sekayu Batang Ai, berengkah ari Engkilili sampai ngagai seradak Batang Ai dikangau ka magang, nyengkaum Pengulu Tembak. Siko anembiak ke enggau ngayau maia nya iyanya Angking Anak Guyang ke becherita kena ka September 19, 2012 ke munyi tu;

“Aku maia nya baru ngangkat ka diri bujang. Bedau bebini lalu deka enggau orang ngayau. Rumah kami maia nya agi ba Nanga Kapok, ulu Keluit. Agi pegai Tr. Mambang. Kami serumah ke enggau iyanya Meragan nyadi ka tuai kami, Mujap, Ading enggau Undum. Udah nerima bungai jarau kami lalu besedia. Sangkuh, duku, terabai, sumpit, laja enggau rajut sigi meruan maianya. Tiap-tiap pintu endang meruan ngibun utai tu naga ka munsuh datai enda temu di maia. Sebedau nurun, kami ngaga piring sandau hari dulu.

Ari Nanga Kapok kami bedarat setengah hari ke Batang Ai ngagai rumah Chaong ba Tanjung Tibu. Bekal bela mai kediri, mak enggau ladung. Ladung mega disedia kena ngema pala munsuh enti boleh. Datai kami ba rumah orang Tibu, sida sigi udah sedia nganti kami. Pia mega bala Bungkung ari Jarau Entambah ari ulu Lubang Baya pan datai. Ari Tr. Chaong bisi sepuluh iko enggau. Sida diketuai ka Kumpang. Pia mega bala Bungkung pan bisi sepuluh iko lalu betuai ka Bungkung empu.

Ari Tanjung Tibu kami ngena perau ngagai rumah Pengarah Jimbun di Nanga Sumpa ulu Delok. Datai kami ba Nanga Sumpa orang sigi udah maioh datai, bisi ga iya ke bedau datai. Sehari udah nya semoa mensia datai magang. Bisi nya ari Engkari, ari Lemanak, ari Sekrang, ari ili Lubok Antu. Angka bisi 1,000 iko bala kami.

Bisi dua malam kami nganti ba rumah Pengarah Jimbun, udah nya kami mupuk lalu ngetu ba sungai Lalang endor ngaga langkau pemansuh. Dia aku meda mensia endang betekisik aja deka ngayau. Bisi sekeda betundi enggau panggan diri, besebut ka jejulok pangan diri. Gari bisi nya ngena sirat, gagong, lelanjang lalu besenyata ka duku, sangkuh enggau terabai. Bisi siko dua ngena tanchut baju lalu mai senapang.

Nyadi langkau pemansuh tu mit. Tak digaga sida ke tuai tanju mit siti ke dikalang enggau kayu empat iti lalu bisi lalau endur bepegai. Ba endur nya bala maioh begelumu berandau, nunga langkau pemansuh. Bisi sekeda mansuh asi enggau ruas nyadi ka bekal mansang ngayau. Orang ke tuai ari ai siti-siti lalu mansang ngagai tanju ke dikumbai Langkau pemansuh siko-siko. Keterubah iya Bungkung ngedulu ka bala tuai. Datai Bungkung ba tanju nya, iya lalu manjung nanam sangkuh, nganggau ka manuk sabung iya. Alik menantu Bungkung lalu merejuk ngambi sangkuh ke ditanam Bungkung. Udah nya lalu dititihka ketuai ke bukai. Pengujung iya, Pengulu Ngali nanam sangkuh nganggau ka manuk sabung iya. Sangkuh Ngali lalu diambi Barau. Udah nya baru Pengarah Jimbun bediri, madah ka atur kayau, nyadi tuai kayau.” Ko Angking nusi pasal sida ke nurun ngayau.

“Kayau kitai baka tu.” Ko Pengarah Jimbun ngepun ka jako ditusi Angking.

“Kitai ngayau ketegal jako orang Emperan ke ngasuh kitai ngayau udah sida nginsah Belayung ari rumah Pengulu Ngali sampai buta. Kitai ngayau ukai munuh orang lalu enda tau ngerusak utai orang. Kitai semina mandang ka pemedis ati diri ke dikepia ka orang Emperan, Besayah. Kitai mansang minta adat. Enti sida enggai meri adat baru kitai ngerampas. Enti sida ngelaban baru kitai tau ngelaban.” Ko Jimbun nyambung jako iya baru.

Bedau tentu ambih jako Pengarah Jimbun nya, dinga mensia nyau sebumu aja mantah. Bungkung dulu bejako mantah.

“Enti bakatu nadai guna kitai ngayau enti munsuh enda tau dibunuh. Dini adat orang ngayau munsuh enda tau dibunuh. Keba dikumbai ngayau munuh ngelaban munsuh.” Ko Bungkung nimbal Pengarah Jimbun.

Sida lalu beserara ka penemu. Nyau udah puas sida beseraraka penemu, udah nya Bungkung lalu angkat madah ka diri pulai enda enggau ngayau. Peda mensia nyau besebumu aja bejako madah ka diri enggai enggau ngayau lalu mupuk mulai ka diri ke menoa diri empu nitih ka Bungkung. Bisi ga madah ka diri deka tang nadai maioh.

“Angkat siko nyau pulai, angkat siko nyau pulai. Kami serumah semina aku aja enggau. Aku ke enggau nya laban ke deka meda bakani orang ngayau, lalu bakani adat orang ngerampas. Agi ga bala Pengulu Ngali maioh bala apai-indai aku.” Ko Angking nyambung jako iya baru.

“Udah nya iya ke enggai nyau pulai, iya ke deka lalu mupuk nitih ka Pengarah Jimbun enggau Pengulu Ngali. Dia aku meda orang tuai kelia enti udah madah ka diri enggai mantah nadai beampun-ampun.” Ko Angking bejako baru.

“Kira bisi tiga malam kami ba rantu jalai, kami lalu datai ba rumah orang ke nyamah Belayong. Datai kami ba tisau rumah, mensia lalu beatur niki. Pengulu Ngali enggau Pengarah Jimbun dulu niki, lalu ditangkan ka mensia maioh. Kira dini ari meh kami niki rumah. Lebuh ke niki nya jani bisi meruik beaus-aus rari ka kami, udok bisi ga nyalak udah nya mensia lalu enggau panjung-panjung niki bebala maioh. Datai ba rumah peda rumah nyau udah puang laban orang rumah nya maioh udah ngerari ka diri dulu, udah nemu kami deka datai ngayau. Semina siko aja apai tuai orang ke tungkut agi ngibun rumah enggau sida sebilik begulai enggau indu bukai. Sida enda ngelaban tang ngaga piring ngampun. Udah nya orang ketuai lalu ngerampas bilik Langgai, orang ke nyamah Belayong. Sida mai sigi tawak, tiga igi tajau enggau maioh utai bukai. Udah nya orang maioh lalu pulai. Kira bisi tiga jam udah kami ke pulai nya, bala soldadu Jawa pan datai, ngagai rumah nya, ngenyah. Enti enda pia ni enda besatup enggau soldadu Jawa kami ambih ditimbak bala soldadu jawa enggau machine gun.

Kami ke pulai tu nyau separ. Bisi sekeda mulai ka diri ke Delok, bisi mulai ka diri ke Mepi, Menyang enggau kemaioh agi nengah Badau lalu ngagai pasar Lubok Antu. Aku pulai ke Delok.” Ko Angking nusi cherita iya ke enggau orang ngayau.

“Sebelah babas, langkau umai sigi ambih ditunu bala maioh. Udah kami ke ngayau nya, dia ketuai ari Emperan ngeransi meda pengawa Pengarah Jimbun. Sida lalu bebai bala maioh deka bebalas tang ditagang perintah ari sepiak nyin. Ari nya Pengarah Jimbun enggau Pengulu Ngali kena anu perintah serta diasuh ngisi tunggu ngagai perintah laban ke ngayau. Barang ke dirampas lalu diasuh perintah dipulaika baru tang bala Pengulu Ngali enggai laban Belayung buta dijamah Langai. Semina tunggu aja diisi sida. Lalu pechara sida tuai ari tu enggau tuai ari Emperan diatur perintah ba kubu Lubok Antu. Ketuai Iban ari Emperan iyanya Temenggong Budit ari Lanja, Pateh Menggong ari Malai enggau Temenggong Tutong ari Ampar.” Ko Angking ngujung ka jako.

“Sapa deka ngambi barang dirampas kami tau ngambi iya ngagai rumah aku ba Nanga Delok. Orang nya sigi bebunuh enggau aku.” Nya jako Pengulu Ngali enggai mulaika barang dirampas.

Meda bakanya, orang Emperan enda ga ngambi barang ke dirampas nya. Laban sida nemu Langai tu udah ngereja penyalah ke besai, udah kelanjur jari kelanjur kaki, udah kelanjur jako..

Nyadi Belayung landik nimang, iya suah diambi orang nimang gawai kenyalang taja pan iya buta. Belayung mega selalu nyala merau besuar-bekayuh kediri nengah wong-rantau menoa Batang Ai  baka orang ke enda buta. Bisi ga orang madah Belayung bisi meda senayau utai tang enda terang.

Lebuh ke nimang niti ruai Belayung tu tak bejalai baka orang ke enda buta, nemu bilik diri lalu nemu pandung ke dipelian. Ke penudi iya timang ke ditimang ka Belayung iyanya nimang ka kenyalang, Mapal Tunggul, Tuan Pemancha Rentap ba rumah iya ba pasar Lubok Antu dalam tahun 2000. Beberapa tahun udah nya Belayung mati ba rumah sida di Nanga Delok.

Jako Mapal Tunggul tu ukai bereti kitai mai duku lalu mapal kayu tunggul. Reti iyanya Gawai ke pemadu iya dudi kena ngintu nutup Gawai Kenyalang, kena nebus dusa diri ke udah bedengah munsuh munuh orang. Badu agi nyumpah ngasuh antu ke dipadahka kenyalang makai orang.

Orang pulai ngayau enda tau enda manjung dulu maia datai pala tangga. Enti bulih dengah sida nganti indu nakuka antu pala. Indu ke nakuka antu pala selalunya bini, indai, ini tauka diri menyadi, orang ke mandal pengidup enggau orang ke baru udah basah jari. Sida ditikika orang enggau babi siko, dibiau enggau manuk serta disempulang enggau piring tujuh. Antu pala lalu disambut bala indu enggau pua kumbu, diwa sida bejako bungah niti ruai enggau tanju sambil disempulang bala indu bukai betabuh.

Jako bungah sida ke indu berua nakuka antu pala niti ruai tujuh kali, nyebut jako bungah baka di baruh tu beulang-ulang kali.

Hai… ah, nambi nambah…

Pala dipumpung pala disalai,

Mata diachuk, mata dikebuk,

Ontak dikeruk, Ontak dikerituk,

« Eeeeee…. Sapa orang dulu nyaing muting geraji, chendik lelayang laki,.. sapa dulu meri darah tumpah kening tuchi… sapa orang berani ati tau tenong, baka aji bunsu remaong,…. Eeee Sanu. » 

Udah bala indu ambih nakuka antu pala, sida lalu pulai ke ruai orang ke bedengah. Antu pala diengkah atas chapan ba tengah ruai lalu dipiringka. Udahnya antu pala digaga sida ringka serta direndam dalam ai sampai kulit enggau untak iya luluh anchor laban ai. Udahnya baru bala indu ngintu antu pala nya muai buk, mata enggau ontak sebedau mai ngagai pedilang endur nyalai. Pengawa nyalai antu pala tu dikumbai enchabuh arong. Sida begawai besai miring sekayu rumah panjai beambi ngabang enggau bala ke sepemakai gawai.

Enti orang nya bisi mati maia ngayau, sida digaga ka orang piring maia anchabuh arong awakka ruh iya ke mati nya tau bebalas dudi ari. Nyadi tu kebuah Iban begawai Kenyalang ba sida ke udah bedengah takutka ruh iya ke disalai di pala ngachau pengidup sida, laban kaban belayan iya ke udah mati miring nyumpah kitai ke bedengah. Nyadi kenyalang nyaga kitai ngelaban sumpah orang.

Gawai Taun

Maia gawai semoa mensia besaup nyembi enggau nutuk padi. Begulai ngepi pulut kena ngaga tuak. Ai tuak endang chulin nadai dichampur enggau gula. Nya ke ngasoh mensia ngepi sampai empat lima benda sepintu. Sebedau gawai, berandau dulu nentu ka hari nyadi serta ngaga keduran miring ke Antu Kepapas enggai ke ngachau pengawa gawai. Rumah ke diambi ngabang lalu ditentuka. Sapa ke bisi pengawa ke besai lalu madah. Orang ke nimang serta sida ke megai pengawa dipejuraika.

Tiga hari sebedau gawai nyadi, dua tiga iko anembiak ke kering agi nganjung piring beambi ngabang serta diuluka siko orang tuai. Sida mai piring enggau tuak ngambi ngabang lalu ngaga bungai jarau nanda hari begawai. Pengabang indu asoh datai dulu nyedia ka utai. Gawai dipenyadika enda tetap maia, semina pengudah ambih ngetau serta ngutun padi. Kemaioh agi gawai tu dikumbai Gawai Batu Padi. Bisi sekeda ngaga Gawai Kelingkang Kenyalang, Kelingkang Benih, Kelingkang Tuah, Kelingkang Panggau, Betambak bulu, bisi sekeda sandau hari aja enggau maioh gawai bukai.

Leboh hari gawai nyadi chukup rami. Tumu pagi semoa mensia udah ke tanju, ngikat babi ba langkau babi ke udah digaga lemai siti. Sebedau nya ngaga piring dulu. Tawak dituntung nganggau ke betara madah ke Hari Gawai dipenyadika. Pagi nya, kira peniki matapanas, pengabang niki disibur bala indu enggau tuak serta dibiau enggau manok sabung kena nyengkelan burung ke jai dibai bala pengabang. Sapa ke berita agi tauka sapa ke megai pengawa ke besai agi dulu niki. Bala indu dara bedijir tuchum ngena ngepan asal kitai Iban nantai kitil ai tuak mantil  bala pengabang ke niki. Beruntun enggau pangan diri enggai alah.

Udah pengabang terenah duduk. Sida ke anembiak diasoh  ngetas pintu nyadi ke pengawa gawai. Bala anembiak ngetas tiap iti tali pintu nanda ke pintu tebuka nerima pengabang tama. Sida diberi bala ke indu ngirup ai tuak. Ai tuak endang penuh gelas mali ke utai olih enda penuh melaluh.  Di tanju sida ke indu bejalai bedijil betangkan-tangkan niti ruai naburka beras kuning ngagai babi ke deka dibunuh ba tanju lalu besampi awakka ati babi tau manah. Pengawa indu baka tu dikumbai Iban Batang Ai Niti Daun. Nya meh maia indu dara ke bajik mantai ke diri empu ngagai pengabang. Udah niti daun lalu ngerandang. Tu maia pungka laki mantai ke pengering serta penyigat diri. Udah tembu ngerandang lalu miring ngelalu ke temuai. Reti ngerandang nya sida ke laki ke mangku pengawa mai orang bilik ke dipegai iya pengawa bejalai setengah ngajat serta manjung nyerauhka nyawa megai duku enggau isang niti ruai. Pengawa ngerandang tu kena ngayuka diri muru antu ke jai ari semoa pengawa. Maia miring nya mensia ngirup enggau makai utai ke dibantai. Udah miring ngelalu ke temuai, lalu ketanju sandau Hari.

Tawak dituntung baru nanda ke pengawa Sandau Hari berengkah. Senapang ditimbak ngasoh sida ke indu mansut ke pedara tauka piring ketanju. Bala ini orang, indai orang enggau sida ke ubas besusun ngena ngepan Iban nganjung piring. Udah nya orang ke megai pengawa lalu berengkah miring lalu bebiau. Babi dibunuh ngulih ke ati iya. Nitih ke penyampau tubuh orang laki ba bilik nya. Udah nya sida ke tuai berengkah meda pemanah ati babi ke nentu ka tuah enggau pengerai serta utai olih tiap iko sida ke dibunuh babi. Udah ati babi temu, piring disimpan ngagai teresang. Udahnya muai berau kuning. Semoa mensia asuh kedalam ruai takut kena pangka beras kuning laban tau ngasuh nyawa danjan.

Tembu ketanju pengabang asoh pulai keruai. Tawak dituntung baru ngasoh sida ke indu mansut ke pemakai keruai meri pengabang makai. Udah nya temuai diasoh mandi serta ngirup sampai lemai hari. Lemainya sida ke nimang lalu berengkah. Piring semilan digaga dulu sebedau berengkah nimang. Orang ke nimang berengkah ari bilik lalu pansut niti ruai sampai pagi siti. Makai lemai endor mantai ke semoa utai dempa baka pansuh semah, kasam enggau salai babi kampung tauka ikan. Ikan pansuh, babi kampung pansuh, salai rusa, barul rusa, gelukos, upa pantu, tubu enggau paku endang nyadi ke lauk bala pengabang. Pengabang asoh makai kenyang-kenyang. Udah makai lalu disibur sida ke indu ngirup. Main asal kitai Iban lalu berengkah. Sida beramban, bepantun, ngajat enggau begendang. Adat belagu, bekeroake, betandak, poco-poco enggau disco bedau bisi maia nya.  Nya adat bansa bukai.

Maia nimang, nya meh maia sida ke laki enggau ke indu beramban nyindir olah panggan diri. Pantun enggau sanggai sigi dipending endor ninga leka jako kenang enggau jako perangsang orang indu ngagai sida ke laki. Tengah malam makai baru. Pagi siti tama bilik ngaga piring tama tuah. Enti nadai pengawa besai baka kelingkang Tuah enggau kenyalang pagi nya pengabang pulai. Sida disibur dulu sampai mabok temutah ke diri. Enti bisi pengawa besai gawai sampai dua tiga hari besambung.

Udah ambih gawai, pagi penudi orang ngaga buluh merapuh, makai begulai. Semoa utai ke bisi diberi tiap pintu dipanduk ba siti kawah besai. Sekayu rumah rami, bebuti, makai, ngirup. Buluh Merapuh retinya macham utai diempa ke biberi sekayu rumah dipanduk sup dalam kawah ke besai. Udah nya diempa bala maioh. Utai ke sup nya baka salai babi, salai ikan, manuk, upa, daun empasa, tubu enggau maioh utai bukai ke bedau abis diempa maia gawai. Sup nya digulai enggau lia. Tiap iko makai sup nya diberi ai tuak segelas. Tuak nya gumpul ari semoa tuak sekayu rumah ke bedau ambih diirup maia gawai. Dia kitai nyepi tuak nadai asai, masam, pait, manis bau bangar. Udah ngirup ai tuak segelas baru kening dichop enggau kapo nanda kitai udah bulih enda tau dikachau orang agi.

Sebedau makai buluh merapuh, mensia maioh berengkah bebuti indu. Tu maia orang laki ngaga diri baka orang indu. Sida ngena ngepan orang indu, bebichu serta begaga ke utai bukai. Sida ke indu ngelulu ke diri baka orang laki. Ngena gari orang laki. Maia nya chukup rami mensia bela gaga ati magang. Tu meh pengujung gawai ke dikumbai ngiling bidai.

Udah gawai, dua tiga hari nadai bisi pengawa agi diau, masu tikai, ngupas bilik lalu nusun pinggai mangkuk enggau pua kumbu ke udah dikena.

Maia udah begawai maioh mensia ngelala pangan diri laban nya maia sida berandau bepeda pangan diri lebih agi sida ke bujang dara. Ditu mega maia bujang dara bekelala enggau pangan diri laban malam hari gawai sida ke bujang bisi bebong ngiga lalu berandau ringkas enggau orang indu. Udah gawai tembu sida nyambung randau sida baru ke ngujungka sida jadi melaki bini.

  

Nitihka cherita tuai, Sengalang Burong bisi rumah panjai di Langit. Iya ba tengah. Pelah Kanan rumah iya Ketupong (Jaloh/Kikeh), Pangkas (Kutok), Kalabu Papau (Ngenabong) enggau Kuding (Burung Malam/Chuit). Pelah kiba Bejampong (Ragak), Embuas (Sinu), Beragai(Gaga) enggau Nendak (Chelap). Bala sida nya menantu iya magang. Ketupong ketuai bala menantu iya lalu mandal iya Bejampong. Burong tu enti bejalai ari kanan ke kiba kumbai mimpin, kiba ka kanan dikumbai raup. Enti ninga bunyi burung baka Ketupong, Pangkas, Papau enggau Kuding selalu ngayuka utai jai. Enti ninga Bejampong, Embuas, Beragai enggau Nendak ngayuka utai manah. Semina geritan Nendak malam hari ngayuka utai jai.

  

Budaya Iban Kelia:

Kelia Iban selalu bejalai tauka belelang ke menoa orang. Lebuh ke belelang nya sida selalu ngayap lalu bebini. Udahnya sarak baru. Bejalai baru lalu bebini baru. Ngena adat begayap, Iban kelia selalu bebini ke ngasuh sida maioh teresak jampat maioh tubuh ari Dayak bukai. Ketuai Iban baka Temenggong Kok, Brauh Ngumbang enda kurang ari enam kali bebini. Bakanya mega sida ke indu selalu butang begulai enggau laki bukai. Laban ba penemu Iban kelia sida ke bakanya bereti manah. Iya ke laki sigat lalu iya ke indu bajik diperebut ka orang.

Adat nyagap tu iyanya siti chara indu enggau laki Iban begulai tinduk. Sida ke laki mansang ngagai peninduk orang indu maia malam hari. Lebuh ke tinduk nya sida ngaga kaul lalu bisi sekeda begulai baka melaki bini. Adat tu endang digalak rumah siti ngagai rumah siti lebih agi bala temuai. Diatu adat ngayap enggau adat selalu bebini udah diketuka Iban.

Prinsip pengidup Iban iyanya kitai enda tau jai enggau orang enti orang nya ukai munsuh kitai. Iban enda mungkal orang sebarang. Mali. Mali tulah, betara enggai meda. Sida nangika Petara di langit ke ngaga dunya. Keba jako Iban Betara baruh dagu. Iya ninga utai disebut kitai, meda semoa pengawa dikerja kitai, nemu peragam ati kitai. Iban mega diajar manah enggau orang, bebasaka orang tuai. Iban mega ngibun penemu manah enggau temuai. Dulu kelia semoa temuai ke datai endang diberi makai perchuma magang enda milih gamal sida. Jako Iban ngading adat pemanah enggau temuai. “Anang ti mensia, udok enti tesat datai ke rumah diberi makai.” Mali tulah jai enggau temuai. Kelia, Iban jarang amat mungkal orang sengapa tang sida pantang dichabar tauka dikelesi. Iban rinduka orang peramah tang enti indu imun nyadika puji orang. Iban mega rindu bebuti enggau begagai. Ba pengujung gawai selalu uti nyadi baka bebuti Indu ba menoa Batang Ai dulu kelia. Endor Iban bungah. Iya ke laki ngaga diri baka indu lalu iya ke indu ngaga diri baka laki.

Iban enda diasuh bula. Keba dulu kelia sapa ke bula selalu digagaka orang tugung. Siti tempat ba tisi jalai ke selalu dipansa orang bejalai selalu ditugungka orang batu. Maia ngepunka nya sida ngaga piring tiga dulu. Tiap iko orang ke mansa enda tau enda nikau ka batu tauka utai bukai mansa nya lalu besumpah nyebut, “nya tu tugung pemula sanu. Utai ke jai, ke sial tinggal ba iya magang.” Tang diatu jako bula tu udah nyadi ka main lebih agi bala pemesai ba politik. Tang nadai siko orang udah berani nugungka pemula bala politik ke bula ka janji. Adat nugungka pemula tu tau dikemesaika ba pengawa politik awak ka orang politik bepikir panjai enti sida deka bejanji bula enggau rakyat sida empu. Adat tugung tu mega tau nyekat sida ke makai suap serta salah guna ba kuasa ngemulaka rakyat maioh, ukai siko dua..

Siti peranggai ke lemi ba Iban iyanya sida taluk ka tuai taja pan tuai salah tauka nya bansa bukai ngempung sida ke maioh tubuh serta megai menoa sida. Iban mudah diupah ngena jako, reta enggau pangkat. Sida sanggup ngereja nama utai diasuh orang baikka nya manah tauka jai, tauka ngerusak bansa iya empu sida enda beduli asal sida bulih utai kediri empu ari pengawa sidanya. Tu ke ngasuh sida mudah endar dialahka orang ba kuasa. Diambi orang ba tanah enggau pengaraja. Dirampas orang ba hak sida empu. Sida selalu temegah ka pengawa diri ngujungka sida sumbung, bongkak serta ngelawaka diri lebih ari patut. Iban rindu dipuji nya ke ngasuh sida alah amat uti laban orang bukai, baikanya ba politik, pemansang, ekonomi enggau maioh pengawa bukai. Iban orang pemalu nya ke ngasuh sida lubah bulih utai, alah laban orang. Sida malu berebut, malu betanya ke ngujungka sida kurang ba pengawa sale & marketing ke penting amat ba pengawa bisness. 

Iban sigi orang kaki ngirup, pengirup ai bisa sampai mutah temabuk ka diri. Nya nandaka pengerami pemadu manah. Orang pemadu gauk enggau kitai. Ngirup sampai mabuk nunjukka pengaga ngagai pangan diri lalu enda ingat ke penusah ari pengawa ke bakanya. Enti ngirup enda nemu badu, enda nemu nagang diri empu tauka betagang pangan diri. Enti enda temutahka diri tauka enda temabuk ka diri ba rumah pangan diri. Orang ke endor ngirupnya dikumbai jai. Luki keno. Iya ke enggau ngirupnya dikumbai enda bungah. Sumbung keno.  

Iban kemaioh agi bingking enggau panggan diri, enggau bansa diri. Sida selalu ngambi ulih. Iban kurang ba pengawa ngaduka ekonomi tauka ngaduka budget diri sebilik. Sida tau dikumbai burus. Duit maioh tebasau ngagai utai ke enda tentu guna, liability, ukai ngagai mansangka esset tauka investment sida empu. Maioh Iban agi penyabung enggau bejudi sampai enda berasap dapur. Anak enda ulih dipelanja sekola jauh nyebut meli rumah, besimpanka duit dalam bank. Nyadi tu sekeda peranggai Iban ke enda manah.

Agi dalam taun 1970 nyauka semoa Iban ngibun pengarap lama. Iya ke masuk Kristian maia nya agi bangkut. Nyembah Jesus enggau orang panggau agi diguna sida kedua-dua. Sida begawai, miring nyembah Petara tauka Antu. Sida nya iyanya Keling, Laja, Bungai Nuing, Pungga, Sempurai, Kumang, Indai Abang, Lulong, Antu Gerasi, Bunsu Remaung, Nabau, Sengalang Burung, Sempulang Gana enggau ruh aki-ini sida ke udah mati. Semoa sida tu orang kayangan magang. Bala kayangan ke ditihka tauka nguluka Iban nyalai antu pala iyanya Orang Panggau, Sengalang Burung enggau Bunsu Remaung.

Keba ba ensera Iban sida tu sigi nyalai maioh antu pala ba rumah sida empu nanda ka sida Bujang Berani. Pangkat Bujang Berani iyanya pangkat ke paling dikerinduka bansa Iban, pangkat ke paling tinggi, pangkat ke paling dipabasaka bansa Iban. Keba Munan, Rentap, Ngumbang, Temenggong Kok, Awang Rawing enggau Kanang Langkau nyadi ka buah jako ba leka pantun kemaiaritu.

Iban enda tentu rinduka pangan diri kaya tauka bisnis, sida benchi meda panggan diri bisi utai. “Orang kaya ngelakar, nipu.” Ko Iban. Nya kebuah orang kaya nadai tentu bisi nama tauka rita ba adat Iban. Semadi orang kaya nya meri sida duit baru Iban rindu.

Ba senentang nyalai Antu Pala tauka Headhunting ko jako ribai, tau endar kitai nyelinting suku kaum Dayak ke bukai di dunya tu ke nyadi penyalai antu pala baka Iban bechuan ka bala orang kayangan diatasnya tadi. Sida nya angka antu ke sama ngiring semoa bansa Dayak ke nyadi Headhunter ari kelia-lia munya di merata dunya tu. Laban Antu ke ngasuh, ngajar, mai, madahka sida penemu enggau pengawa nyalai antu pala, antu ke sama penemu. Tuju sida ngibun antu pala nya sama magang iyanya nyadika tropi. Pol Pot iyanya bansa Dayak di Kamboja ke ngibun paling maioh Antu Pala, beratus ribu igi. Iya dikumbai orang siko mensia ke paling kejam udah ditemu.

Enggau antu pala, sida ke udah kelanjur jari ngereja penyalah tau ngisi tungu nebus diri ngena antu pala. Ulun orang tauka anak ampang tau nyadi orang berita benama nyadi tuai enti udah bedengah, basah jari munuh munsuh bulih antu pala. Rakyat bukai deka nitihka nuan magang enti tua maioh antu pala. Antu pala mega tau kena nyanda pemakai baka padi enggau garam. Antu pala mega tau diganti enggau tajau, tawak, tanah, menoa enggau utai bukai. Bakani kati apai-indai indu enggau indu empu enggai ka lakinya enti laki nya nyurungka antu pala ke ulih iya empu ngagai sida sebilik, orang nya pan mesti nerima laban enti enda iya deka ditinggang adat ke besai. Antu enggai meda sida, nyumpah sida tusah enda bulih utai.

Bisi ga Iban ngibun Antu Pala ketegal belayaka menoa. Pala iya ke alah menoa diibun iya ke menang, nyadi ka tanda menang berebut ka menoa. Manok sabung ke pemadu kering asuh sida belaban sampai mati tepumpungka pala pangan diri ba moa mensia maioh. Tang pengawa tu jarang nyadi ba Iban semina iya ke temu direta iyanya manuk sabung Pengulu Simpi belaban enggau Laut Tawang. Laut Tawang alah ke ngujungka tanah menoa Tawang diempu Iban sampaika seharitu. Pala laut tu agi diibun Iban menoa Indonesia sampaika seharitu. Manuk sabung Temenggong Simpi iyanya menyadi iya empu, Tami tauka Temenggong Rentap.

Bisi sekeda Iban minta pala basah kena ngetas ulit orang ke bangat disayauka sida mati ke dikumbai adat ngemuling. Pala basah retinya, minta antu pala ke baru, agi bedarah, bedau disalai. Nya kebuah maioh Iban ngayau ngaga kayau anak laban ngulihka dengah baka tu. Orang ke ngirup ai jalong maia Gawai Antu di menoa Saribas mega begunaka orang udah bedengah, enti enda iya tau danyan mati kena sumpah bala lembambang ke nimangka ai jalung.

Nyadi tu pemesai reti, guna Iban enggau antu pala dulu kelia. Ukai semoa Iban ulih nyalai antu pala. Semina orang ke bisi pedilang aja ke tau nyalai, sida tu bisi batu unggun. Maioh Iban ke bulih antu pala ke enda tau nyalai antu pala nganjung antu pala nya ngagai orang ke damping tiris pantih enggau iya laban antu pala nya lalu empu bilik iya ke nyalai. Enti iya ke bulih antu pala nya deka begunaka antu pala ke udah diulih iya, iya mesti minta enggau adat enggau piring enggau randau enggau jako. Enti enda iya tau kena tinggang adat ngerampas.

Mumpung serta nyalai pala orang, nya siti dosa ke paling besai ba adat agama Kristian, Budha, Hindu enggau agama ke bukai. Nyauka semoa ugama ba dunya modern tu nagang orang mumpung pala orang serta ngajar orang idup bedamai. Nyauka semoa Betara tauka ketuai agama ari semoa agama modern tu enda nyagi pengikut iya munuh orang bukai, ngasuh orang idup manah-manah anang belaya, bebunuh, bepumpung pala panggan diri.

Semina agama Islam aja ke nyelai ba dunya modern tu agi bisi ngaga turai ba papan turai sida ngasuh bala iya munuh orang ke enda sebaka agama enggau sida, lebih agi bala Jihadist. Betara orang Islam nadai mantah sida ngereja pengawa ke bakanya, sigi diasuh Allah Taala sida pia ko Nabi sida ke benama Muhammad. Jako jihad empu deh endang ngasuh orang muslim enggai meda orang ke ukai Islam lalu ngapuska sida nya. Munuh orang ukai Islam siti prais ke paling manah ba moa Petara orang Islam. Bakanya mega sida ke deka rari ari Islam endang sigi tau dibunuh magang.

Ari ajar Islam ke bakatu, dia kitai selalu ninga serta meda ba berita TV tauka internet pasal orang Islam ke bejalaika pengawa Jihadist mumpung pala orang baka Iban dulu kelia ke bejalaika kayau anak nyerang indu anembiak di sebarang endor. Ajar Islamnya ke ngasuh sekeda orang Islam agi ngibun pengawa menggal pala serta munuh orang ke ukai Islam di sebarang endor sampaika seharitu ke deka dipunaska Gerempung Bangsa. Ari penemu Islam tu ke udah ditulis sida ba Al-Quran, nya ke ngasuh sekeda orang Islam agi kayang-kayang dibai Gerempung Bangsa munaska bala Jihadist. Sida asai ke enda nitihka adat agama Islam agi, asai ke ngelaban Nabi Muhammad serta asaika ngelaban Petara sida.

Taja pan pengawa bala Islam Jihadist sama enggau pengawa Headhunter dulu kelia ke munuh orang ngena chara kejam, mumpung pala orang, ngaga kayau anak munuh orang ke enda ngadang baikanya indu tauka anembiak tang nadai ga bukti ke udah ditemu madahka sida tu ngibun penemu ke sama lalu nyemah petara ke sama ngasuh sida munuh orang bakanya. Semina prinsip ajar Nabi Mohammad tu aja ke sama ajar enggau Antu Gerasi ke ngasuh munuh orang ke enda sebulu enggau sida.

Diatu maioh Iban udah masuk Kristian lalu ngelengka ka pengarap lama enggau chara idup di rumah panjai. Sida maioh udah pindah ke nengeri ningalka rumah panjai baka bansa bukai. Arinya maioh budaya Iban lenyau. Iya ke baru masuk Kristian agi asai rawan tang maioh ke tegap penemu. Sida nyau udah maioh masuk gerempung agama Kristian di seluruh dunya. Bakannya, mega Dayak bukai di dunya tu, baka Dayak Nagaland, Dayak Kalash di Pakistan, Dayak di Afrika, Dayak di Australia, Papua, New Zealand, Asia , Amerika udah maioh nitihka jalai baka Iban, muai pengarap lama sida lalu mupuk diau ba nengeri nitih ka singkang pemansang kemaiaritu. Sida bepolitik, bedagang, besekola enggau maioh pengawa modern ke bukai.

Perengka kena kerja.

Perengka kena Iban kerja ngidupka diri maioh macham. Iban ili enggau Iban ulu lain perengka kena kerja. Iya ke selalu dikena Iban ulu kelia iyanya ma, agak, ragaq, sintung, lanji, ladung kena mai utai. Baka, tibang, lugu benih kena nyimpan padi. Chapan kena ngebau berau. Perampan kena nyembi utai. Tikai, bidai kena ngebab ruai tauka bilik endor duduk. Bubu, kemansai, bubung, ginti, jala, pukat, tambih, tali panjai, tubai kena nangkap ikan. Lesung, alu, kisar kena nutuk padi. Pengayak kena ngayak berau ke udah ditutuk. Ketam kena ngetau padi. Kapak, duku latuk, duku amat kena mantap utai. Beliong enggau peredah kena beban tangkir enggau ruang perau. Lunga kena ngeraut wee. Peti, panjuk, sangkuh, pendawan, gangsai kena munuh jelu. Atap kajang, tangi, kajang ma kena beteduh kena ujan. Suar, sengayuh, penimba, lantai perau enggau akit kena ngundurka barang.

Dulang kena meri anak mit mandi. Dulang babi kena meri babi makai. Dulang uduk kena meri uduk makai. Sengkalan kena netak utai. Kangup, baku kena engkah pinang enggau insap. Temilah kena engkah laja enggau pengaruh. Indai guro kena nakutka anak mit. Ragom tauka pentik kena muru antu. Engkeramba iyanya patung anak mensia kena ngeba jelu makai umai. Pemanggai kena engkah giling tikai, sumpit enggau nyabur. Peputan, tukul, kikir kena ngambuh. Geragaji kena ngelubang utai. Penyayat kena netak utai. Taji kena nyabung manuk. Ripang, ripan kena ngaga jala enggau pukat. Tikong kena ngulih ka indu nyerungan. Sengkuar kena muru manuk tauka kena nyuluk buah. Lidi, lilin, kena indu betenun. Teresang kena engkah pedara. Tali penduk kena nanchang utai.

Barang kena ngilum baka sirih, kelait, semakau, kapo, kandi pinang enggau penutuk ilun. Kapo mega kena Iban kelia muchau beperubat. Kapo dichal ngagai tubuh iya ke sakit baa bi ke pedis enggau ba kening. Lunga kadang-kadang kena Iban kelia bebabut. Orang ke landik bebabut orang ke nemu michit tubuh orang ke sakit ngena jari. Iya nemu muai penyakit dalam tubuh iya ke sakit enggau michit abi ke pedih. Sambil iya sambal iya ngamangka lunga enggau nyepu abi ke dipichit iya. Udahnya abi nya dikelai iya enggau kapo serta disembur iya enggau ludah pinang iya empu.

Iban nginsap kelia semina ngena ruku apung enggau semakau tanam ke udah dipepat serta dijembi. Semakau digulung enggau ruku apung nyadi insap.

  

Agak mit ari mag iya dikena mai utai ke mimit tauka utai ke bau, basah baka buah maia bejalai kebabas enda lama. Kadang mak bisi tutup lalu gagag manahka agi laban iya kena mai utai beguna serta manahka agi. Iya kena mai utai maioh agi maia bejalai lama di babas tauka nemuai ngagai kaban belayan.

  

Lanji ke mit dikumbai lugu benih laban iya dikena nyimpan tauka mai benih padi ke deka ditugal.

Sintong dibingkai enggau wee danan ke udah dibelah lalu sirap nipis. Nyandik sintong bisi reti ba jako kelaung. Iya dikumbai nanya indu. Kitai mai bentak selong, piring enggau utai bukai disimpan dalam sintong nanya indu.

  

Iban Politik Enggau Ekonomi.

Sebedau masuk Malaysia, Sarawak enggau Sabah endang nadai kaul mimit enggau Malaya. Sida kediri sejarah, budaya, agama, keturunan, bansa, ekonomi, politik, perintah enggau kuasa. Maia perintah Brooke Iban pechah dua, Iban Ili enggau Iban Ulu. Iban Ili nyangkaum Iban Remun, Iban Balau, Iban Undup, Iban Seribas enggau Iban Ili Rejang. Sida tu nanahka Brooke. Iban Ulu iyanya Iban Batang Ai, Iban Sekrang, Iban Lemanak, Iban Katibas Ulu, Iban Balleh enggau Iban Batang Kanyau. Sida tu ngelaban perintah Brooke. Sida bebunuh bisi 52 tahun ari taun 1868 udah pemati Balang ngagai bepantap babi ba Simanggang dalam tahun 1920. Maia tu nadai bisi surat ke menyana nusun jalai Iban ngetanka menoa 52 tahun ari ke diambi Brooke. Iban Ili betuaika Jugah, Ijau Lelayang, Dana Bayang, Linggir, Nanang enggau Munan. Iban Ulu betuaika Rentap, Ngumbang, Bantin, Kana, Moa Ari, enggau Ranggau. Pemaioh mensia mati, reta tengkira ke lenyau enggau penusah bukai nadai tentu dirikot maia tu.

Iban politik tau dikumbai kitai berengkah ari sida masuk Federation Malaysia ke endor sida nyadi Negara Authonomy dalam Malaysia ukai nyadi siti State ke selalu disebut orang Malaya baka kediatu. Atur ke masuk Malaysia tu maioh diuraika sida ba Aum Kapit dalam taun 1962 ke ngibun 18 iti Perkara. Udah Merdeka ari British dalam bulan July 22, 1963, Iban nyadi ketuai merintah menoa Sarawak ke majority bansa Dayak. Enda lama udah nya, dalam September 16, 1963 sida masuk Persekutuan Malaysia nitihka Sabah enggau Singapura. Brunei matak diri ari masuk Malaysia taja pan keterubah iya sida bisi ati deka enggau masuk. Sida takut ka diri empu kena tipu orang ari Malaya ngambi pengaya menoa Brunei lebih agi asil minyak menoa nya. Kediatu udah manggai 1 Trillion Ringgit minyak Sarawak udah kena ambi Malaya lalu semina 5 % aja diberika Sarawak.

Dua taun udah masuk Malaysia, Singapura dibuai Tunku Abdul Rahman ke nyadi Perdana Mentri Malaysia ari Persekutuan Malaysia, laban iya takut ka kuasa orang Melayu ulih diambi bansa China enti Singapura agi masuk Malaysia. Pengawa Rahman tu ngasuh Sabah-Sarawak curiga ke mai mensia maioh bisi ati deka keluar Malaysia sampaika seharitu. Tambah agi pengawa Malaya ke ngelakar Sabah-Sarawak kediatu ba ekonomi, politik, pemansang enggau pentadbiran negara. Nadai nitihka sempekat Aum Kapit.

Kelia batang pengawa bansa Iban iyanya bumai bukit, nyala, ngasu, ngintik ngiga jelu dalam babas. Nyauka semoa Iban rumah panjai kelia ngibun pengawa umai. Nyadi tu social-ekonomi Iban kelia. Sida enda tau enda ngidup ka benih padi pun. Sida takut amatka padi pun sida nya punas. Enti padi pun nya punas retinya sida udah lenyau antu padi ba biliknya. Reti padi pun nya iyanya asal padi ke diibun sida diri sebilih ari kelia munya. Ari turun temurun ke enda temu dipun. Bisi ga sekeda madahka padi pun nya diberi Antu baka Sempulang Gana, Sengalang Burung tauka orang Pangau. Lalu nya nanda ka sida purih orang nya. Benih nya nanda ka penatai asal bilik sida. Sapa ke pechah ari nya mai benih nya.

Ba penemu Iban kelia padi nya bisi antu kediri iya empu. Nyadi antu padi tu ke ngasuh Iban begawai tiap taun Nunggah antu padi. Nya ke dikumbai kitai Iban Gawai Panggul tauka Benih. Sapa ke angkat ari biliknya tauka ngaga chabang bilik baru, iya mesti mai benih ari bilik ke endur iya angkat. Nya alai sida ke sama benih sigi sama peturun aki ini. Tu mega kena sida nanda diri sama diri sama peturun aki-ini. Maia nugal padi pun nya dulu ditanam, udahnya baru benih bukai. Nya ke dikumbai Iban nugal padi pun tauka Ngelabuh Padi Pun. Nyadi pengawa nugal padi pun tu besai amat reti kelia. Sida sebilik bela sampal ke umai. Anak ke sekola enti enda jauh diambi asuh ngetu sekola maianya. Sida bisi ngaga piring, engkalan enggau ngaga pemakai manahka agi ari hari bukai. Nyadi nya pemesai guna padi pun. Maianya mega Iban besampi naburka berau kuning, besumpah ngasuh utai ke jai rari magang ari umai, mati magang enti ngachau umai. Pia mega sida besumpah minta tuah, limpah, pengaya, pengeraja orang bukai tau datai tauka pindah ngagai sida. Nyadi diatu padi pun maioh udah lenyau Iban nyau jarang bumai agi.

Dalam parti, bansa Dayak maioh kena pechahka orang laban semina ngena chara ngemechahka gerempung Dayak aja bansa bukai ulih nyadi ketuai megai puchuk perintah menoa Sarawak. Parti bansa Dayak iyanya SNAP, SUPP, PBB, PBDS, PRS, STAR, DAP, PKR enggau maioh gerempung parti ke bukai. Semoa sida dalam partinya agi dipegai bansa bukai magang. Tajapan tubuh sida maioh agi ari bansa bukai. Iban bedau udah diberi peluang nyadi Ketuai Menteri Sarawak enggau manah kelimpah ari Tawie Seli enggau Kalong dalam taun 1963-1967, tajapan sida ba parti ke megai perintah.

Ketuai bansa Dayak ke mai Dayak masuk Malaysia iyanya Tun Jugah taja pan Kepala Mentri Sarawak keterubah iyanya Stephen Kalong Ningkan, Iban ari Betong. Iya kena buai perintah Kuala Lumpur ketegal ke deka keluar Malaysia ngena chara setenggah pejal, taja pan bala ari Malaya ngumbai iya bisi penyalah. Udahnya iya diganti Pengulu Tawie Seli ke nadai bisi pelajar, Iban ari Simanggang. Tawi Seli pan kena buai baka Kalong lalu diganti bansa Melanau ke masuk Islam.

Tu meh pengujung pengelabuh politik bansa Iban tauka Dayak di Sarawak ke ngujung ka sida asai ke diperintah orang bukai ke mimit agi tubuh. Arinya kuasa sida, hak sida majak dikurangka orang lebih agi sida ke megai pengawa perintah enggau dagang menoa Sarawak. Anak sida ke besekola pan nyau tusah masuk Universiti ngambi kursus ke penting enggau bulih scholarship. Tanah asal sida maioh kena rampas kompani bansa bukai. Kayu kampong sida ditebang serta dijual enggau nadai meri penguntung ke sida. Bala sida ke patut bebas beugama nyau disekat, ngujungka semina agama Islam aja tau diajar ba sekola taja pan sekola mission agama Kristian lama udah diajar ba sekola.

Ba bidang ekonomi, bansa Dyak nyau nadai agi enggau orang ba Nation Building ngatur rancangan ekonomi, meda penatai duit, nentuka guna duit enggau tuju pemansang menoa. Sida semina nitih utai ke dipadahka bansa bukai. Sida enda kena ambi bejuraika ekonomi Malaysia. Ari nya bansa Dyak jauh amat tinggal ba ekonomi enggau bisnis enda bulih 1 % ari ekonomi di menoa Sarawak taja pan tubuh sida lebih 40% ari tubuh rakyat menoa Sarawak. Ba bisnis sida pan bakanya, nadai tentu bisi peluang. Sida tusah ngambi projek ari perintah enggau kompani ke besai baka Petronas enggau Shell Sarawak laban sida disekat ngena jalai scanning ke ketat ngerijister kompani sida nyadi Vendor List.

Diatu nyauka semoa projek ke besai kena ambi orang ari Malaya baikanya ba projek perintah tauka oil & gas industry. Lebih 90% rumah kedai ba pasar dibeli bansa China. Nyauka semoa pengawa dagang ba Sarawak dimonopoli bala China. Iban nadai bisi radio, tv, pencetak surat kediri empu agi numpang ba orang. Penimpang tu ke ngasuh bala Dayak rebak baru maioh enda puas ati tang sida nadai daya laban semoa kuasa dipegai orang bukai. Lebih ari 50 taun sida ke ngenatka diri bakanya. Tu ke ngasuh bala rebak baru enda puas ati sampai sekeda mai keluar Malaysia.

Taja bakanya, maioh ga Iban udah maju nyadi pilot, nyadi mentri, nyadi lawyer, nyadi doctor, nyadi engineer, nyadi hakim, nyadi ahli politik, nyadi cooperate, nyadi ahli sukan serta masuk bidang bisnis enggau ahli politik. Sida maioh ngaga gerempungka diri empu baka Dayak Chamber of Commerce and Industry (DCCI), Sarawak Dayak National Union (SDNU) & Sarawak Dayak Iban Association (SADIA). Opis pencetak bup enggau magazine sida udah dipadam ka perintah lalu nadai sambung agi. Sida diasuh nunsung orang bukai. Rumah Dayak ke nyadi rumah gerempung sida udah dirubuh perintah.

Nyadi diatu (2016) Ketuai Menteri Sarawak ke baru, Tan Sri Adnan Satem, iyanya bansa Melayu, nguji deka ngubah utai nya lalu nitih ka sempekat Sarawak authonomy masuk Malaysia enggau naka ulih kelimpah ari deka ngemansangka Sarawak serta nyungkakka  pengidup mensia maioh nitihka pemansang di Malaya taja pan setakat kediatu utai ke deka dikerja iya bedau bisi udah dipeda mata nyadi.

Dayak Apokayan Borneo.

Nitih ka cherita siko bansa Kenyah ari Lepo Tan madah bansa Kayan/Kenyah tu iyanya bala ari menoa China. Ko iya. Sembilan  ratus taun ke udah lalu, bisi Raja Tiongkok ke benama Akalura ari Selatan menoa China nganjung berapa buah kapal ke Borneo. Seraban ari sida singgah lalu tinggal ba Brunei. Sida tu ngumbai diri Kayan. Seraban agi singgah ba Baram lalu ngumbai diri Kenyah. Cherita Kayan ke pindah ari menoa China tu nyauka serebak enggau pemindah Pengulu Kandungan ke mai raban iya pindah ari Kambuja ngagai Batang Mahakam di Samarinda. 

Ari dua iti tempat tu sida ngerekai ke menoa bukai. Sida ngulu sungai Baram, ngulu sungai Limbang, nujah seradak Balui, Tinjar, ulu Rejang, ulu Balih sebedau sida melunggang ke Batang Mahakam enggau Kayan di menoa Kalimantan Timur. Maia ke pindah tu sida bebunuh ngelaban orang asal baka bansa Baketan, Seru enggau Ukit. Orang tu alah laban sida. Ba Batang Kapuas sida besatup enggau bansa Iban. Sida enda tentu taan laban Iban ke ngujungka sida lari ke ulu sungai baka seradak menoa Baram, Batang Rajang, Batang Kayan, Batang Mahakam, ulu sungai Limbang

Kelia adat sida tu baka adat Dayak bukai ke diau ba pulau Borneo. Sida berumah panjai, ngibun antu pala, begawai, nanam padi bukit. Sida landik ngukir, ngajat enggau besanggai. Diatu sida maioh masuk Kristian lalu diau ba bandar. Ba Kalimantan Timur sida maioh masuk Islam. Gamal Kayan/kenyah putih ari gamal Iban nyauka sebaka gamal enggau Kadazan, murut enggau Banjar.

Nyadi ba politik, ekonomi, budaya, agama, kaul enggau dunya luar, Dayak Kayan sama enggau Dayak Iban. Sida mega bisi wakil maia Sarawak ke deka masuk Malaysia.

Kemaioh agi bansa Kayan tu diau ba Kalimantan. Suku kaum bukai ke nyauka baka gamal, adat chara, jalai pengidup bansa Kayan iyanya Kenyah, Kejaman, Kanayan, Bekumbai, Bahau, Lun Bawang, Kelabit enggau Berawan. Kadang sida tu kumbai orang Orang Ulu tauka Apokayan. Kelia kemaioh agi sida tu diau ba Central Borneo, ulu Batang Kayan, ulu Rejang, ulu Baram, ulu Balleh enggau ulu Tatau.

Suku kaum Dayak bukai baka Ngaju, Kantu, Memaloh, Benua, Ot-Danun enggau Mualang sida nyauka baka gamal Iban serta maioh ngambi chara, budaya enggau jalai pengidup suku kaum Iban. Kelia kemaioh agi sida tu diau ba ulu Batang Kapuas enggau Batang Lupar iyanya North West Borneo. Sida diau bekampi enggau bansa Bidayuh. Nya kebuah sida semak agi enggau Bidayuh.

Bansa Bidayuh maioh suku kaum ke mit. Jako sida bisi besimbil mit ari pangan diri tang budaya sama. Sida datai ari peturun ke sama. Sida nya baka Bidayauh Salakao, Bidayuh Singai, Bidayuh Padawan enggau Bidayuh Gedong. Ba Kalimantan Barat maioh Bidayuh Salakao.

KAPIT  RESOLUTIONS  1962

The Iban conference @Aum reached their general agreement that the "scheme" should be supported, subject to certain conditions, and their resolutions when the Cobbold Commission visited Kapit on the 19th March 1962.

The "Kapit Resolutions 1962" were as follows:

1.        Head of Sarawak State: The Head of the State of Sarawak to be a native of Sarawak. Some groups expressed a wish that he should be elected by the people. Some would like him to have the title of Rajah and to be an Iban. In either case, it was held that he should be eligible, with the Heads of other States in the new Federation, for the post of Head of the Federations. One or two groups asked that, during the initial period, a British Governor should be retained.

2.        Head of State of Malaysia: The Head of each State in the Federation of Malaysia to be eligible in due course to be the Head of the Federation of Malaysia. Some Ibans asked that he should be given the title of President as the title Yang di-Pertuan Agong is Malay, and is not acceptable.

3.        Tradition Custom: "Adat Lama" to remain under the control of the Government of the State of Sarawak as it has until to-day.

4.        Sarawak Land: Land to be under the control of the State including the existing rights of the natives of Sarawak in such matters as land.

5.        National language: There was some difference of opinion. Some groups suggested that there should be no national language; others wanted it to be Iban. Still others were willing to have Malay or Iban.

6.        Official Language: English to remain the official language of the State of Sarawak and to continue to be one of the official languages of Malaysia. There was agreement among groups that English should be retained either indefinitely or for at least fifteen (15) years as the official language, not only in Sarawak but in the new Federation as well. Some groups wished Iban as well as English to be an official language.

7.        Religion: Freedom in religious worship

8.        Federal Representation: There is to be adequate representation for Sarawak in the Federal Government. A number of groups asked that this should be worked out on a combined population and areas basis and that, within the number of seats allocated to Sarawak in the House of Representatives, the Ibans should have equal representation with the Malays and the Chinese.

9.        Native Employment: British officers to remain until replaced by properly qualified local people. Natives to have a fair share of Government employment.

10.     Native Privileges and Status: Sarawak natives to enjoy the same status and privileges as Malays in Malaya.

11.     Education: Education to be a Federal subject and to be equalized throughout Malaysia as soon as possible. Sarawak natives to have a fair share of overseas scholarships.

12.     Medium of instruction in schools: English should be retained as the medium of instruction, but Iban should be taught as a subject.

13.     Immigration: Immigration to remain under the control of the State of Sarawak.

14.     State Powers: Powers reserved in the Constitution to a State may not be changed without the agreement of the State.

15.     Development: Development in Sarawak to be accelerated.

16.     Religion: Much emphasis was placed on the need for freedom of religion as there is at present, i.e., freedom to profess, practice and propagate any religion. There was a general feeling that Sarawak should be a secular State and the suggestion was made that if Muslims were given assistance from Federal funds, other religions - Christianity was specially mentioned - should enjoy similar treatment.

17.     Name of the new Federation: There was dislike of the name "MALAYSIA" and hope that some other name could be devised. Many alternatives were suggested.

18.     Armed Forces: The Ibans are anxious to have a fair chance of service in the Federation's armed forces.

19.     Sarawak State: A number of groups wanted to be sure that they could have a separate Sarawak State flag - some mentioned the old Rajah's flag – a State anthem and a National Day.

20.     Self-Government: The Ibans had been looking forward to the self-government which had been promised to them, and the principal reason why they were ready, on conditions, to accept the Malaysia proposals, despite their uncertainties, was because they were confident that the British Government would not recommend the scheme if it was not going to be beneficial to them.

21.     Equal rights: Ibans wanted to be treated by the Malays as brothers, but not as the younger brothers. They were opposed to the idea that Sarawak should be treated as only one of 15 States in a Federation of Malaysia; they maintained that this would give her too small a voice in the new Federation's affairs.

The 51 Chiefs at the conference together were said to represent some 112,000 Ibans out of a total population of nearly 238,000 and many delegations of Ibans who came before the Cobbold Commission teams at different centers in the Third Division confirmed that they supported the "Kapit Resolutions 1962".

In a small number of cases a demand was made that they should either be accepted without alteration or that any changes should be made only after there had been opportunity for further discussion with the Iban people.

While the great majority of the Ibans in the Third Division who were in favor of the Malaysia plan took their stand on the "Kapit Resolutions 1962", there were some groups who gave their full support to the "scheme" on the basis of the recommendations in the report of the Malaysia Solidarity

Sarawak Consultative Committee (MSCC) Delegations in Singapore were represented by (3^rd February 1962):

Yeo Cheng Hoe – Leader, Members are Ong Kee Hui, Temenggong Jugah Ak Barieng, Pengarah Montegrai Ak Tugang, Dato Abang Haji Openg, Ling Beng Siew, James Wong and Remigius Durin Ak Nganau.

Iban:  Selamat Ngintu Hari Gawai Dayak.                      Bidayuh Serian:  Selamat Andu Gawai Dayak.  

Bidayauh Bau:  Selamat Onu Gawai Dayak.                 Bidayuh Lundu:  Selamat Gawe Dayak

Kayan:  Selamat Dau Gawai Dayak.                              Kenyah:  Selamat Tau Gawai.

Kelabit:  Doo Adto Irau Dayak.                                       Lun Bawang:  Do Aco Irau Dayak.

Berawan:  Selamat Echiew Gawai.                                Saban:  Selamat Siew Gawai

Bisaya:  Selamat Nyambut Adau Gawai Dayak.            Melanau:  Selamat Lau Gawai Dayak.

Penan:  Jian Dau Gawai Dayak.                                     Selakau:  Selamat Sabaya-bay Repo Gawe Dayak.